Mapusa PWD: म्हापसा पाणीपुरवठा विभागाच्या इमारतीच्या छताची दुरावस्था झाल्याची चर्चा बरेच दिवस सुरु होती या घटनेसंबंधी एक धक्कादायक माहिती समोर येतेय. बुधवारी (25 ऑक्टोबर रोजी) सकाळी या इमारतीच्या छताला आधार देण्यासाठी उभारलेला लाकडी खांब निखळून पडला. सुदैवाने या घटनेत कार्यालयातील कुणाही व्यक्तीला दुखापत झाली नाही.

दरम्यान सदर इमारतीची दुरावस्था होत चालली असून या घटनेमुळे इमारतींसह येथे काम करण्यासाठी येणाऱ्या कर्मचाऱ्यांच्या सुरक्षेचा प्रश्न ऐरणीवर आला आहे. तसेच सदर इमारत जीर्ण झाली असून या इमारतीच्या नूतनीकरणाची मागणी केली जात आहे. राज्यातील जुन्या आणि जीर्ण इमारतीं प्रश्नी काँग्रेसचे युरी आलेमाव यांनी सरकारकडे इमारतींच्या देखभाल आणि नूतनीकरणासंबंधी आवाहन केले होते.

सरकारने गोव्यातील सर्व वारसा इमारतींच्या दुरुस्ती, नूतनीकरणाचा कृती आराखडा तयार करावा. इव्हेंट आयोजनावर निधी वाया घालवण्यापेक्षा सरकारने प्रथम या वारसा इमरतींचे जतन करण्यावर लक्ष केंद्रित करावे असे आलेमाव यांनी काही दिवसांपूर्वी सांगितले होते.

कांपाल आणि रायबंदर येथील जुने गोमेकॉ इस्पितळ, मडगावचे हॉस्पिसिओ, कांपालचे मॅकेनिज पॅलेस, पणजीत समाज कल्याण खात्याची इमारत, मडगावचे नागरी आरोग्य केंद्र, शिक्षण खात्याची दक्षिण जिल्हा कार्यालय अशा वारसा वास्तू ‘असुरक्षित’ असल्याचे स्पष्ट झाले आहे, असेही ते म्हणाले होते.