PM Modi Birthday: टाइम्स स्क्वेअरवर पंतप्रधान मोदींचा गौरव! भारतीय समुदायाने दिल्या वाढदिवसाच्या खास शुभेच्छा; 140 कोटी भारतीयांसाठी अभिमानाचा क्षण

PM Narendra Modi Birthday Wishes Times Square Billboard: पंतप्रधान नरेंद्र मोदी यांच्या वाढदिवसानिमित्त अमेरिकेत राहणाऱ्या भारतीयांनी एक अत्यंत नेत्रदीपक उपक्रम राबवला. न्यू यॉर्क शहरातील जगप्रसिद्ध 'टाइम्स स्क्वेअर'वर एका भव्य डिजिटल स्क्रीनवर पंतप्रधान मोदींना वाढदिवसाच्या खास शुभेच्छा देण्यात आल्या. टाइम्स स्क्वेअर हे जगातील सर्वात गजबजलेले आणि प्रसिद्ध ठिकाण मानले जाते. या ठिकाणी दररोज लाखो पर्यटक येतात. पंतप्रधान मोदींच्या वाढदिवसाचा हा डिजिटल संदेश या प्रसिद्ध स्क्वेअरमधून जाणाऱ्या हजारो लोकांनी प्रत्यक्ष पाहिला आणि याचे फोटो तसेच व्हिडिओ सोशल मीडियावर मोठ्या प्रमाणावर व्हायरल झाले.

हा अनोखा उपक्रम 'फेडरेशन ऑफ इंडियन असोसिएशन', 'जयपूर फूट यूएसए', 'द डायस्पोरा बाय-वीकली', 'गुजराती असोसिएशन्स ऑफ नॉर्थ अमेरिका', 'फेडरेशन ऑफ इंडो-अमेरिकन सीनिअर्स असोसिएशन्स ऑफ नॉर्थ अमेरिका', 'वडताल धाम - न्यूजर्सी' आणि 'बिहार झारखंड असोसिएशन ऑफ नॉर्थ अमेरिका' यांच्या संयुक्त विद्यमाने आयोजित करण्यात आला.

टाइम्स स्क्वेअरवर झळकलेला हा संदेश पंतप्रधान नरेंद्र मोदी यांच्या नेतृत्वाबद्दल भारतीय-अमेरिकन समुदायाला वाटणारा आदर आणि अभिमान स्पष्टपणे दर्शवतो. या उपक्रमात सहभागी झालेल्या विविध संस्थांच्या प्रतिनिधींनी नमूद केले की, हा केवळ शुभेच्छा संदेश नसून, परदेशात राहणाऱ्या संपूर्ण भारतीय-अमेरिकन समुदायाची एकता, स्वाभिमान आणि भारताच्या प्रगतीबद्दलची कृतज्ञता व्यक्त करणारी एक सुंदर प्रतीक-रचना आहे. परदेशात राहूनही आपल्या मातृभूमीच्या प्रगतीचे शिल्पकार मानल्या जाणाऱ्या पंतप्रधानांना थेट जागतिक व्यासपीठावरुन सन्मानित करण्याची ही विशेष कल्पना आंतरराष्ट्रीय स्तरावर प्रचंड चर्चेचा विषय ठरली.

या विशेष प्रसंगी सर्व सहभागी संस्थांनी पंतप्रधान मोदी यांच्या उत्तम आरोग्यासाठी, दीर्घायुष्यासाठी आणि देशसेवेच्या कार्यात त्यांना निरंतर यश व शक्ती लाभो, अशा मनःपूर्वक शुभेच्छा व्यक्त केल्या. न्यू यॉर्कच्या मध्यवर्ती भागात भारताची संस्कृती, भारतीय समुदायाचा प्रभाव आणि पंतप्रधान मोदींचे जागतिक स्तरावरील नेतृत्व यांचा हा त्रिवेणी संगम भारतीय वंशाच्या लोकांसाठी अत्यंत अभिमानास्पद क्षण ठरला. या उपक्रमामुळे अमेरिका आणि भारत यांच्यातील सांस्कृतिक व लोकशाही संबंध अधिक दृढ होण्यास मदत झाली असून, जागतिक पटलावर भारतीय डायस्पोराची ताकद पुन्हा एकदा अधोरेखित झाली.