Mapusa: मोपा विमानतळाला भाऊसाहेब बांदोडकर यांचे नाव द्यावे, अशी मागणी करत नामकरण समितीतर्फे म्हापशात मंत्री सुदिन ढवळीकर यांच्या प्रतिमेचे दहन करण्यात आले. यावेळी समितीने ढवळीकरांच्या वक्तव्याचा निषेध केला. ढवळीकरांनी मगोप सोडून स्वतःच्या हिमतीवर मडकई मतदारसंघात निवडून येऊन दाखवावे, असे आव्हानही समितीने ढवळीकरांना दिले.

काल समितीतर्फे म्हापशात पत्रकार परिषद घेण्यात आली. यावेळी समितीचे निमंत्रक सुभाष केरकर, संजय बर्डे, दीपेश नाईक, जितेश कामत, नारायण गडेकर, सीतेश मोरे व इतर उपस्थित होते. यावेळी सुभाष केरकर यांनी ढवळीकर यांच्या विधानांचा खरपूस समाचार घेतला.

ढवळीकरांनी भूमिका स्पष्ट करावी

मगोपच्या केंद्रीय समितीने मध्यंतरी भाऊसाहेबांचे नाव मोपा विमानतळाला द्यावे, असा ठराव घेतला होता. मात्र, आता भाजप सरकार जो निर्णय घेईल, तो मगोपला मान्य असेल, असे सांगण्यात येते. याबाबत ढवळीकरांनी आपली भूमिका स्पष्ट करावी. ढवळीकरांचे खरे प्रेम मगोपवर आहे की, भाजपवर ते स्पष्ट करावे, असे म्हणत संजय बर्डे आणि जितेश कामत यांनी ढवळीकरांच्या विधानाचा तीव्र शब्दांत निषेध नोंदविला.