नवी दिल्ली : महागड्या आणि दमदार बाईक्सची आवड असणाऱ्या ग्राहकांसाठी एक महत्त्वाची बातमी आहे. प्रीमियम मोटरसायकल निर्माता कंपनी Ducati आपली नवीन अ‍ॅडव्हेंचर बाईक भारतीय बाजारपेठेत दाखल करण्याच्या तयारीत आहे. कंपनीने नव्या Ducati DesertX V2 या बाईकसाठी भारतात बुकिंग सुरू केली आहे. सोशल मीडियाच्या माध्यमातून कंपनीने याची माहिती दिली आहे. अद्याप बाईकच्या लॉन्चिंगची तारीख आणि अधिकृत किंमत जाहीर करण्यात आलेली नाही. मात्र, ही बाईक भारतीय बाजारात दाखल झाल्यानंतर तिची एक्स-शोरूम किंमत अंदाजे १९ ते २० लाख रुपये असू शकते. नवीन इंजिन, सुधारित सस्पेंशन आणि आधुनिक तंत्रज्ञानामुळे ही बाईक चर्चेत आली आहे.
नवीन Ducati DesertX V2 मध्ये ८९० सीसी क्षमतेचे ९०-डिग्री V2 इंजिन देण्यात आले आहे. जुन्या मॉडेलमधील ९३७ सीसी Testastretta 11-degree इंजिनच्या तुलनेत या नव्या इंजिनमध्ये बदल करण्यात आले आहेत. विशेष म्हणजे, ऑफ-रोडिंगचा अनुभव अधिक चांगला व्हावा आणि सर्व्हिसिंगमधील अंतर वाढावे, या गोष्टी लक्षात घेऊन इंजिन विकसित करण्यात आले आहे.
या इंजिनमधून ९,००० आरपीएमवर ११०.३ एचपी पॉवर आणि ७,००० आरपीएमवर ९२ एनएम टॉर्क मिळतो. यासोबत सहा-स्पीड गिअरबॉक्स देण्यात आला आहे. बाईकमध्ये मोनोकोक फ्रेमचा वापर करण्यात आला असून त्यामुळे तिच्या रचनेतही महत्त्वाचे बदल पाहायला मिळतात.
Ducati कंपनी स्टँडर्ड मॉडेलसोबत DesertX Rally हे व्हेरिएंटदेखील सादर करणार आहे. विशेषतः खडकाळ रस्ते, डोंगराळ भाग आणि कठीण ऑफ-रोड ट्रॅकवर बाईक चालवण्याची आवड असणाऱ्या रायडर्ससाठी हे व्हेरिएंट तयार करण्यात आले आहे.
यामध्ये ४८ मिमीचे पूर्णपणे अ‍ॅडजस्ट करता येणारे KYB फ्रंट फोर्क सस्पेंशन मिळते. त्याला क्लोज्ड-कार्ट्रिज डिझाइनसह Kashima आणि DLC कोटिंग देण्यात आले आहे. फ्रंट व्हीलचा सस्पेंशन ट्रॅव्हल २३१ मिमीवरून वाढवून २४९ मिमी करण्यात आला आहे. या व्हेरिएंटची सीट हाइट ८७८ मिमी आहे. त्यामुळे उंच रायडर्सना ही बाईक चालवताना अधिक सोयीस्कर ठरू शकते.
ऑफ-रोडिंगसाठी बाईकची चाके आणि टायर्स महत्त्वाचे असतात. हे लक्षात घेऊन DesertX V2 Rally मध्ये हलके Excel Takasago सेंटर-स्पोक ट्यूबलेस रिम देण्यात आले आहेत. कठीण रस्त्यांवर अधिक मजबुती आणि टिकाऊपणा मिळावा, यासाठी त्यांची रचना करण्यात आली आहे.
मागील चाकामध्ये ३६ स्पोक देण्यात आले असून त्याचा रिम स्टँडर्ड मॉडेलपेक्षा अधिक अरुंद आहे. त्यामुळे खडबडीत रस्ते आणि ऑफ-रोड ट्रॅकवर बाईक चालवताना मदत होऊ शकते. Rally व्हेरिएंटमध्येही मोनोकोक फ्रेम देण्यात आली आहे. या बाईकचे इंधन वगळून वजन २०९ किलो आहे.
नवीन DesertX V2 मध्ये केवळ इंजिन आणि सस्पेंशनच नाही, तर तंत्रज्ञानाच्या बाबतीतही अनेक सुविधा देण्यात आल्या आहेत. यामध्ये ५ इंचांचा TFT डिस्प्ले आणि क्रूझ कंट्रोल मिळणार आहे. याशिवाय रायडिंग मोड, पॉवर मोड, कॉर्नरिंग ABS, ट्रॅक्शन कंट्रोल, व्हीली कंट्रोल आणि इंजिन ब्रेक कंट्रोल यांसारख्या सुविधा असतील.
बाईकमध्ये बाय-डायरेक्शनल क्विकशिफ्टरदेखील देण्यात आला आहे. या सुविधेमुळे क्लचचा वापर न करता गिअर वरच्या आणि खालच्या क्रमांकावर बदलता येतात. त्यामुळे रायडिंग अधिक सोपे आणि आरामदायी होण्यास मदत होते.
Ducati ने भारतात DesertX V2 ची बुकिंग सुरू केली असली, तरी लॉन्चिंगची तारीख आणि अधिकृत किंमत अद्याप जाहीर केलेली नाही. उपलब्ध माहितीनुसार, या बाईकची एक्स-शोरूम किंमत १९ ते २० लाख रुपयांच्या आसपास असण्याची शक्यता आहे. त्यामुळे प्रीमियम अ‍ॅडव्हेंचर बाईक खरेदी करण्याचा विचार करणाऱ्या ग्राहकांचे लक्ष आता Ducati च्या अधिकृत घोषणेकडे लागले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.