पणजी: माजी उपपंतप्रधान तथा गृहमंत्री स्‍व. सरदार वल्लभभाई पटेल यांनी १९४६ पासूनच ‘गोवा मुक्ती’साठी प्रयत्‍न सुरू केले होते. गोवा भारताचा अविभाज्‍य घटक आहे. त्‍यामुळे गोव्‍याला पोर्तुगिजांच्‍या जोखडातून मुक्त करणे आवश्‍‍यक असल्‍याचे सांगत भारतीय लष्कर गोव्याला केवळ दोन तासांत मुक्त करू शकतात, असेही त्‍यांनी म्‍हटले होते;

परंतु तत्‍कालीन पंतप्रधान पं. जवाहरलाल नेहरूंच्या अहिंसावादी परराष्ट्र धोरणामुळे गोव्याला मुक्त होण्‍यासाठी वाट पाहावी लागली असे म्‍हणत, मुख्यमंत्री डॉ. प्रमोद सावंत यांनी नेहरूंवर पुन्‍हा एकदा खापर फोडले. राष्ट्रीय ‘एकता दिना’निमित्त शनिवारी पणजीत आयोजित कार्यक्रमात ते बोलत होते.

केंद्रीय मंत्री श्रीपाद नाईक यांच्‍यासह प्रशासनातील अधिकारी यावेळी उपस्‍थित होते. वल्लभभाई पटेल यांनी गोवा मुक्तीचा विषय कायम लावून धरलेला होता. १९४६ मध्‍ये त्‍यांनी तत्‍कालीन काँग्रेस अध्‍यक्षांना पत्र पाठवून गोव्‍याचा भारतात समावेश होणे महत्त्‍वाचे असल्‍याचे म्‍हटले होते. त्‍यानंतर केंद्रीय मंत्रिमंडळाच्‍या बैठकीतही त्‍यांनी तशी मागणी केलेली होती; परंतु पोर्तुगिजांची सत्ता असलेल्‍या गोव्‍यावर भारताने हल्ला केल्‍यास त्‍याचे परराष्‍ट्र धोरणावर परिणाम होण्‍याची भीती नेहरूंनी बाळगली. त्‍यामुळे गोवा त्‍यावेळी मुक्त होऊ शकला नाही.