Laser Run City Tour Competition नेपाळमध्ये होणाऱ्या मॉडर्न पेंटॅथलॉनमधील ग्लोबल लेझर रन सिटी टूर स्पर्धेसाठी भारतीय मॉडर्न पेंटॅथलॉन महासंघाने गोव्याच्या बाबू गावकर, शिवनाथ माजीक व युग दळवी यांची निवड केली आहे. स्पर्धा 25 व 26 नोव्हेंबरला होईल.

गोव्यात झालेल्या 37 व्या राष्ट्रीय क्रीडा स्पर्धेत यजमानांनी मॉडर्न पेंटॅथलॉनमध्ये यशस्वी कामगिरी बजावताना 1 सुवर्ण, 1 रौप्य व 6 ब्राँझ अशी एकूण 8 पदके जिंकली होती. स्पर्धेत गोव्याचे पहिले सुवर्णपदक जिंकण्याचा मान बाबू गावकर याने मिळविला होता.

त्याने पुरुषांच्या लेझर रनमध्ये अव्वल कामगिरी नोंदविली. शिवाय त्याने मिश्र लेझर रनमध्ये रौप्यपदकही पटकावले होते. युग दळवी याने दोन ब्राँझपदकांची, तर शिवनाथ माजीक याने एका ब्राँझपदकाची कमाई केली होती.

गोवा मॉडर्न पेंटॅथलॉन संघटनेचे अध्यक्ष संजीव गडकर, भारतीय मॉडर्न पेंटॅथलॉन महासंघाच्या अध्यक्ष संध्या पालयेकर, प्रशिक्षक कीर्तन वैझ, सावियो लैताव, वीरेंद्र माजीक यांनी बाबू, शिवनाथ व युग यांचे अभिनंदन केले आहे.