Kadamba Transport गोव्यात 70 टक्के नागरिक रोज बसप्रवास करतात. त्यात महिलावर्गाचाही मोठ्या प्रमाणात समावेश आहे. लगतच्या महाराष्ट्र आणि कर्नाटक सरकारने महिलांना एसटी प्रवासांत विशेष सवलत मिळवून दिली आहे.

गोव्यात अशा योजना सुरु झाल्यास सरकारी तिजोरीवर काहीसा भर पडणार असल्याचे बोलले जात असतानाच रोज फुकट प्रवास करणाऱ्यांचा ताप KTC मागील काही काळापासून सहन करत होते. मात्र महामंडळाने महसूल गळती रोखण्यासाठी विशेष प्रयत्न सुरू केले आहेत.

यातीलच एक भाग म्हणून या विषयसंदर्भातच एक महत्वाची बातमी हाती आलीय. कदंब महामंडळाने 2018-19 ते 2022-23 या पाच वर्षांच्या कालखंडात विनातिकीट म्हणजेच फुकट प्रवास करणाऱ्या प्रवाशांकडून तब्बल 7 लाखांहून अधिक रकमेचा दंड वसूल केला आहे.

विनातिकीट प्रवास करणाऱ्या प्रवाशांकडून दंड वसूल करण्यात येतो. गेल्या पाच वर्षांत महिन्याला सरासरी 12 हजार, तर वर्षाला 1 लाख 44 हजार रुपयांचा दंड वसूल करण्यात आला आहे. 2019-20मध्ये सर्वाधिक 2 लाख 36 हजार 875 रुपये दंड वसूल करण्यात आला.

‍फुकट प्रवासी पकडण्यासाठी विविध मार्गांवरील बसची तपासणी केली जाते. 2019-20 मध्ये 26 हजार 791 बस, 2020-21मध्ये 23 हजार 114 बस, तर 2021-22 मध्ये 18 हजार 958 बस तपसण्यात आल्या.

या विनातिकीट प्रवाशांना पकडण्यासाठी कदंबतर्फे कर्मचाऱ्यांचे पथक तयार करण्यात आले आहे. तसेच या मोहिमेसाठी विशेष अधिकारी वर्गही तैनात करण्यात आला आहे. या अधिकाऱ्यांनी मागील काही काळात तब्बल 36 हजार 780 वाहकांची तपासणी केली.