फोंडा: भारत देशाला जगभर 'हिंदुस्थान' या नावाने संबोधले जाते, ही सर्वांसाठी अभिमानास्पद बाब असून गोवा म्हणजे भोगभूमी असल्याचा अपप्रचार केला जातो. परंतु गोवा ही भोगभूमी नसून योगभूमी आहे. शंखनाद महोत्सवासारखे उपक्रम गोव्याची आध्यात्मिक ओळख दाखवतात, असे उद्‌गार मुख्यमंत्री डॉ. प्रमोद सावंत यांनी काढले.

फर्मागुढी फोंडा येथे आजपासून (१७ मे) सुरू झालेल्या तीन दिवसीय शंखनाद महोत्सवाच्या उद्घाटन सोहळ्यानंतर मुख्यमंत्री बोलत होते. फर्मागुढी येथील विस्तीर्ण मैदानावर हा महोत्सव आयोजित करण्यात आला होता.

यावेळी सनातन संस्थेचे प्रमुख सच्चिदानंद सद्‌गुरू जयंत आठवले, कुंदा आठवले, कुंडई तपोभूमीचे पीठाधीश सदगुरू ब्रह्मेशानंदाचार्य स्वामी, देवकीनंदन ठाकूर, केंद्रीय ऊर्जा राज्यमंत्री श्रीपाद नाईक, गोव्याचे वीजमंत्री सुदिन ढवळीकर, भाजप प्रदेशाध्यक्ष दामू नाईक, समाजकल्याण मंत्री सुभाष फळदेसाई तसेच म्हैसूरचे राजे यदुवीर कृष्णदत्त वडियार, 'सुदर्शन न्यूज'चे सुरेश चव्हाणके सनातन संस्थेचे वीरेंद्र मराठे आणि अभय वर्तक उपस्थित होते.

'गोव्याला अध्यात्मिक पर्यटनाची राजधानी बनवण्याच्या दृष्टीने सरकारने अनेक प्रकल्प राबवले आहेत. सप्तकोटेश्वर मंदिराचे नूतनीकरण व सुशोभीकरण, मंगेश, शांतादुर्गा आणि तांबडी सुर्ला अशा मंदिरे-परंपरेचे जतन करत ‘होम स्टे’, रस्ते-वीज-इतर पायाभूत सुविधा निर्माण, ऐतिहासिक दस्तऐवजांचे प्रदर्शन यांसारख्या सुविधांच्या उभारणी सह गोव्यात धार्मिक पर्यटन वाढविण्यासाठी कार्य केले आहे', असे प्रमोद सावंत यांनी म्हटले आहे.

प्रचंड गर्दी; पण सर्व शिस्तीत !

शंखनाद महोत्सवाला साधक, कार्यकर्ते आणि हितचिंतकांची प्रचंड गर्दी होती. तब्बल २५ हजार जणांनी या महोत्सवासाठी नोंदणी केली होती. गर्दी झाली असली तरी सर्व काही शिस्तीत सुरळीत पार पडले. विशेष म्हणजे येथे मांडण्यात आलेले छत्रपती शिवाजी महाराजकालीन शस्त्रांचे आणि संतमहंतांच्या पादुकांचे प्रदर्शन लक्षणीय ठरले.