पणजी: सुधारित ‘शॅक धोरणा’अंतर्गत १ जुलै ते ३० सप्टेंबर २०२६ या कालावधीत समुद्रकिनाऱ्यांवर डेक-बेड्स, छत्र्या, तसेच टेबल आणि खुर्च्या ठेवण्याच्या परवानगीसाठी पर्यटन खात्‍याने पात्र खासगी शॅक चालक, रेस्टॉरंट्स आणि हॉटेल्सकडून अर्ज मागवले आहेत. २२ जून ते ३ जुलै या कालावधीत मडगाव आणि पणजी येथील प्रादेशिक सुविधा केंद्रांवर किंवा खात्‍याच्‍या संकेतस्थळाद्वारे हे अर्ज सादर करता येणार आहेत.

परवानगीसाठी खात्‍याने परवाना शुल्‍क म्‍हणून ५६ हजार रुपये आणि त्यावर लागू होणारे कर निश्चित केले आहेत. तसेच, अर्जदारांना १० हजार रुपये अर्ज शुल्क आणि ‘जेईएल’ला देण्‍यासाठी ११ हजार रुपये प्रक्रिया शुल्क भरावे लागेल. ही दोन्ही शुल्के परत न मिळणारी असतील. नवीन अर्जदारांना ५० हजार रुपयांची सुरक्षा ठेव जमा करणे आवश्यक असेल, असे पर्यटन संचालक केदार नाईक यांनी जारी केलेल्‍या अधिसूचनेत म्‍हटले आहे.

पात्रता काय?

परवानाधारक खासगी शॅक चालक, पर्यटन विभागाकडे नोंदणीकृत असलेल्या किंवा गोवा पर्यटक व्यापार नोंदणी अधिनियम, १९८२ अंतर्गत खात्‍याकडे नोंदणीसाठी अर्ज केलेल्या आणि ज्यांच्या खासगी मालमत्तेची पश्चिम सीमा समुद्रकिनाऱ्याला लागून आहे, अशा हॉटेल्स आणि रेस्टॉरंट्सकडून अर्ज स्वीकारले जातील.

डेक बेड, छत्र्या, टेबल आणि खुर्च्या ठेवण्याची परवानगी केवळ पर्यटन खात्‍याने मंजूर केलेल्या सीमांकीत क्षेत्रातच जागेची उपलब्धता, जागेची परिस्थिती आणि इतर संबंधित बाबी विचारात घेऊन दिली जाईल.– सरकारी जमिनी तसेच समुद्रकिनारी क्षेत्रात अतिक्रमण करणाऱ्या अर्जदारांचे, संस्थांचे अर्ज विचारात घेतले जाणार नाहीत.– परवान्यात नमूद केलेला कालावधी संपताच सर्व डेक बेड, छत्र्या, टेबल आणि खुर्च्या तत्‍काळ काढून टाकण्यात याव्यात.– डेक बेडच्या प्रत्येक संचावर परवाना क्रमांक दर्शवणारा रंग दिला जाईल.