CM Pramod Sawant रिल्स बनविण्याच्या नादात कोणाची बदनामी होत नाही, तर ते पर्यटकांनी आणि स्थानिकांनीही पाहिले पाहिजे. कारण आता रिल्सवाले गोवा सायबर पोलिसांच्या रडारवर आलेले आहेत. कोणाची बदनामी करणारे रिल्स बनविल्यास त्यांना तुरुंगाची हवा खावी लागेल, असा इशारा मुख्यमंत्री प्रमोद सावंत यांनी दिला आहे.

आमदार दाजी साळकर यांनी शून्य प्रहरात इऩ्स्टाग्रामवर रिल्स बनविणाऱ्यांचा मुद्दा उपस्थित केला. लोकांच्या अभिव्यक्ती स्वातंत्र्यांचा आम्हाला आदर आहे, परंतु त्याचा वापर कोणाच्याही बदनामीसाठी करू नयेत.

विशेषतः पर्यटक कोठेही जाऊन व्हिडिओ तयार करतात. अनेकांना स्थळांचे पावित्र्य राखावयाचे असते हे माहीतच नसते. त्यामुळे काहीवेळा बनविल्या जाणाऱ्या रिल्स या बदनामीकारक असल्याचे आढळून आले आहे. त्यामुळे अशा रिल्स बनविण्यावर कारवाई करावी अशी मागणी केली होती.

दरम्यान, मुख्यमंत्री सावंत म्हणाले, गोवा पोलिसांच्या सायबर गुन्हे शाखेला या प्रकरणात लक्ष घालण्यास सांगितले आहे. गोव्‍यासंबंधी बदनामीकारक असणाऱ्या रिल्स ब्लॉक केल्या जातील आणि बनविणाऱ्यांवर कारवाई केली जाईल. रिल्स सारख्या प्रकारातून नाहक बदनामी होते, ती कोणीही करूनच नये. अनावश्‍यक बदनामी टाळावी.