Women industrial opportunities Goa

पणजी: गोव्याच्या उद्योग क्षेत्रात महिलांसाठी मोठी संधी उपलब्ध करून देण्याचा सरकारचा मानस आहे. महिलांसाठी औद्योगिक वसाहतीतील लहान प्लॉट्स ३० टक्के आरक्षित करण्याचा महत्त्वपूर्ण निर्णय उद्योगमंत्री माविन गुदिन्हो यांनी आज जाहीर केला. या निर्णयामुळे महिला उद्योजकांना व्यवसाय सुरू करण्यासाठी आवश्यक जमीन सुलभ रितीने होणार असून, महिलांच्या उद्योजकीय विकासाला चालनाही मिळणार आहे.

एमएसएमई डीएफओ - गोवा, भारत सरकार व द असोसिएटेड चेंबर्स ऑफ कॉमर्स अँड इंडस्ट्री ऑफ इंडिया (असोचेम), नाबार्ड यांच्या संयुक्त विद्यमाने ‘एमएसएमईचे सामर्थ्य उलगडणे: संधी आणि पुढील दिशा’ या विषयावर कार्यशाळा आयोजित करण्यात आली होती. या कार्यशाळेत मंत्री माविन गुदिन्हो यांनी महिलांच्या उद्योजकीय विकासाबद्दल विचार मांडले.

मंत्री गुदिन्हो म्हणाले की, मागील ‘आयडीसी’च्या बोर्ड बैठकीत लहान प्लॉट हे महिलांसाठी ३० टक्के आरक्षित ठेवण्याचा ठराव संमत केला आहे. महिलांना आम्ही प्राधान्य देणार असून लवकरच हे धोरण देखील तयार केले जाईल.

या आरक्षणामुळे महिला उद्योजकांना उद्योग सुरू करण्यासाठी अधिक संधी मिळतील. महिलांनी उद्योग क्षेत्रात पुढे येणे महत्त्वाचे असून, या माध्यमातून महिला सक्षम होण्यास मदत होईल.

व्यवसाय क्षेत्रात येणाऱ्या महिला आणि युवकांना स्टार्टअप योजनांचा लाभ घेण्यासाठी माहिती आणि जागरूकतेची आवश्यकता आहे. अशा कार्यशाळांच्या माध्यमातून या योजना पोहोचतात. या उद्योजकांना योग्य मार्गदर्शन मिळाले तर अधिक आत्मविश्वासाने नवीन उद्योजक उद्योग सुरू करू शकतील,असे उद्योगमंत्री म्हणाले.

‘मायक्रो फायनान्स’चा मिळेल लाभ!

लहान उद्योग करणाऱ्या महिलांना आणि पुरुषांनाही ‘मायक्रो फायनान्स’चा फायदा मिळावा, यासाठीही विशेष योजना आहेत. विशेषकरून महिलांनी व्यवसाय सुरू केला तर त्या इतर महिलांना देखील व्यवसायात आणू शकतात, असे मत मंत्री गुदिन्हो यांनी व्यक्त केले असून यामुळे आर्थिक स्थैर्य आणि सामाजिक प्रगती साधता येईल. महिलांसाठी औद्योगिक प्लॉट्सचे आरक्षण हे धोरणात्मक पाऊल आहे. याशिवाय केंद्र आणि राज्य सरकारच्या विविध योजनांमधून महिला उद्योजकांना आर्थिक सहाय्य देखील मिळणार आहे. ‘नाबार्ड’च्या योजनांसाठीही महिलांना प्रोत्साहन दिले जाणार आहे, असे गुदिन्हो म्हणाले.