पणजी: सरकारी उच्च माध्यमिक आणि व्यावसायिक शाळांमध्ये तासिका तत्त्वावर कार्यरत असलेल्या दहा वर्षांहून अधिक सेवा पूर्ण केलेल्या शिक्षकांना सेवेत नियमित करण्याची प्रक्रिया १५ दिवसांत सुरू केली जाईल, असे आश्वासन मुख्यमंत्री डॉ. प्रमोद सावंत यांनी दिल्याची माहिती कामगार नेते ॲड. अजय प्रभुगावकर यांनी दिली.

प्रभुगावकर यांच्या नेतृत्वाखालील शिष्टमंडळाने मुख्यमंत्र्यांची भेट घेतली. यावेळी कोणत्याही शिक्षकाला सेवेतून कमी केले जाणार नाही, याची खात्री करण्याबरोबरच शिक्षकांचे प्रलंबित प्रश्न सोडविण्यासाठी त्यांच्याशी चर्चा करण्याचे निर्देश मुख्यमंत्र्यांनी शिक्षण संचालकांना दिल्याचे प्रभुगावकर यांनी सांगितले.

विधानसभा निवडणुकीपूर्वी दहा वर्षांहून अधिक सेवा केलेल्या तासिका तत्त्वावरील शिक्षकांना सेवेत कायम करण्याची प्रक्रिया पूर्ण होईल, अशी आशा त्यांनी व्यक्त केली. उच्च माध्यमिक शाळांमध्ये १५० हून अधिक, तर हायस्कूलमध्ये १०० हून अधिक तासिका तत्त्वावरील शिक्षक कार्यरत आहेत. त्यापैकी अनेकांनी दहा वर्षांची सेवा पूर्ण केली आहे. काही व्यावसायिक शिक्षकांनी २० वर्षांहून अधिक काळ सेवा बजावली असून, त्यांचा विषय उच्च न्यायालयात प्रलंबित असल्याचेही प्रभुगावकर यांनी नमूद केले.