पणजी: राज्यात मागील दोन दिवसांपासून पावसाची तीव्रता वाढली असून बुधवारीही प्रतितास ४० ते ६० किमी वाऱ्याच्या वेगाने पाऊस बरसण्याची शक्यता आहे. त्यासोबतच राज्यातील समुद्रकिनाऱ्यांवर ३.६ ते ४.२ मीटर उंचीच्या लाटा उसळण्याची शक्यता राष्ट्रीय महासागर सूचना सेवा केंद्राने व्यक्त केली आहे.

पावसाची तीव्रता आणि एकंदरीत स्थिती पाहता गोवा वेधशाळेने बुधवारी ऑरेंज अलर्ट जारी केला आहे. मागील २४ तासांत सरासरी २.४० इंच पावसाची नोंद केली असून आतापर्यंत राज्यात सरासरी ६७.१० इंच पावसाची नोंद झाली आहे.

आतापर्यंत सर्वाधिक ९४.१३ इंच पावसाची नोंद धारबांदोडा, तर सांगे येथे ९०.७४ इंच पाऊस नोंदविला गेला आहे. मागील २४ तासांत सर्वाधिक ४ इंच पावसाची नोंद म्हापसा येथे करण्यात आली.

त्याखालोखाल सांगे येथे ३ इंच, पणजी २.८५ पेडणे २.७७ इंच, जुने गोवे २.४४ इंच, केपे २.३६ इंच, दाबोळी २.२९ इंच, साखळी १.९८ इंच, धारबांदोडा १.८७ इंच, काणकोण १.७७ इंच, फोंडा १.५७ इंच, तर मुरगाव येथे १.४० आणि मडगाव येथे १.२२ इंच पावसाची नोंद केली आहे.