वाळपई: सत्तरी तालुक्यात शनिवारी दिवसभर कोसळलेल्या मुसळधार पावसासह वादळी वाऱ्याने मोठी पडझड घडली. तालुक्यात बाराहून अधिक ठिकाणी मोठमोठी झाडे उन्मळून पडल्याने घरे, रस्ते, वीजवाहिन्या आणि इतर मालमत्तेचे २५ लाख रुपयांहून अधिक नुकसान झाले. सुदैवाने जीवितहानी झाली नाही.

काही ठिकाणी पावसाचे पाणी घरात शिरल्याने नागरिकांचे हाल झाले. दाबे-सत्तरी येथील गुरुदास म्हाळशेकर यांच्या घरावर आंबा व फणसाची मोठी झाडे कोसळून मोठे नुकसान झाले. भिंती, छप्पर आणि घराचा काही भाग उद्ध्वस्त झाला.

दिवसभर अग्निशमन दल, वीज खाते आणि आपत्कालीन यंत्रणा मदतकार्यात गुंतल्या होत्या. भर पावसात जवानांनी घरांवर, रस्त्यांवर आणि वीजवाहिन्यांवर पडलेली झाडे हटवून वाहतूक सुरळीत करण्याचे काम केले.

ब्रह्मकरमळी, भुईपाल, दाबे, कोपार्डे-हेदोडे, पाडेली, म्हाऊस, आंबेडे-कुमळीची घाट, वाळपई आणि पालीसह अनेक भागांत झाडे कोसळल्याच्या घटना घडल्या. काही ठिकाणी झाडे थेट वीजवाहिन्यांवर पडल्याने वीजपुरवठा खंडित झाला. वीज कर्मचाऱ्यांनी प्रतिकूल हवामानातही काम केले.

बागायतींचीही हानी; वाहतूक कोंडी

वादळी वाऱ्यामुळे काही घरांची पत्रे व छप्परे उडून गेली असून बागायतीचेही मोठे नुकसान झाले आहे. रस्त्यांवर झाडे पडल्याने वाहतुकीत अडथळे निर्माण झाले आणि काही काळ वाहतूक कोंडी झाली.

नद्या-नाल्यांची पाणी पातळी वाढण्‍याची भीती

हवामानाचा जोर कायम राहिल्यास नद्या-नाल्यांची पाणीपातळी वाढून पूरसदृश परिस्थिती निर्माण होण्याची शक्यता व्यक्त होत आहे. प्रशासनाने नागरिकांना अत्यावश्यक कामाशिवाय घराबाहेर पडू नये तसेच मोठ्या झाडांखाली किंवा जीर्ण इमारतीजवळ थांबू नये, असे आवाहन केले आहे. अग्निशमन अधिकारी संतोष गावस यांच्या मार्गदर्शनाखाली ज्ञानेश्वर गावस व सहकाऱ्यांनी तीन वाहनांच्या मदतीने दिवसभर मदतकार्य केले.

कोठे झाली पडझड?

दाबे, शिवाजीनगर-खडकी, ब्रह्मकरमळी, भुईपाल, कोपार्डे-हेदोडे, पाडेली, म्हाऊस, आंबेडे-कुमळीची घाट, वाळपई, पाली व अन्य भाग.