पणजी: गेल्‍या काही दिवसांपासून राज्‍यात कोसळत असलेल्‍या पावसाने मंगळवारी आणखी जोर धरला. त्‍यामुळे राजधानी पणजीसह बांबोळी, सत्तरी, डिचोली आदी भागांमध्‍ये पडझडीच्‍या घटना घडल्‍या. काही भागांत नद्यांना पूर येऊन पाणी रस्‍त्‍यांवर आले. त्‍यामुळे रस्‍ते पाण्‍याखाली जाऊन वाहतूक मंदावली. दरम्‍यान, पुढील चार दिवस अधूनमधून पावसाच्‍या जोरदार सरी बरसण्‍याची शक्‍यता व्‍यक्त करून गोवा वेधशाळेने ‘यलो अलर्ट’ जारी केला आहे.

अरबी समुद्रात कमी दाबाचा पट्टा तयार होत असल्‍यामुळे महाराष्‍ट्र, कर्नाटक, गुजरातसह गोव्‍यातही मुसळधार पावसाचा अंदाज व्‍यक्त करून हवामान विभागाने तीन दिवसांसाठी ‘ऑरेंज अलर्ट’ जारी केला होता. त्‍यानुसार गेले दोन दिवस पावसाची रिपरिप सुरूच होती.

आजपासून चार दिवस ‘यलो अलर्ट’

१.तिलारी नदीची पातळी धोकादायक; सतर्कतेचा इशारा

२.पणजीतील उद्योग भवन इमारतीचा सज्जा कोसळला

३.दूधसागर नदीच्या पाण्याच्या पातळीत वाढ

४.पेडे इनडोअर स्टेडियमचे सिलिंग कोसळले

५.बांबोळी रस्त्यावर मोठ्या प्रमाणात पावसाचे पाणी

६.पणजीतील अष्टमीच्या फेरीतील विक्रेत्यांना मोठ्या प्रमाणात फटका

तरीही सरासरी ३.३ टक्‍के तूट

गेल्‍या २४ तासांत राज्‍यात सुमारे ३.५ इंच पाऊस पडला. यंदाच्‍या मान्‍सून हंगामात १ जून ते १९ ऑगस्‍टच्‍या सकाळपर्यंत ९४.७९ इंच एवढ्या पावसाची नोंद झाली आहे. या काळात सरासरी ९८.०५ इंच पाऊस पडतो. त्‍यामुळे यंदा आतापर्यंतच्‍या पावसात सरासरी ३.३ टक्‍के इतकी तूट आहे.

आतापर्यंतचा पाऊस (इंच)

म्‍हापसा ८१.७

पेडणे ८९.५८

पणजी ७८.६२

जुने गोवे ८९.६४

साखळी ९६.९४

वाळपई १२०.८३

फोंडा १००.५५

धारबांदोडा १२६.२२

काणकोण ९१.६६

दाबोळी ६७.२९

मडगाव ७९.३१

मुरगाव ६४.४२

केपे ११५.३६

सांगे १२४.०९