पणजी : गेल्या काही दिवसांपासून सुरू असलेल्या वादळी वाऱ्यासह पावसामुळे राज्याच्या विविध भागांत झाडे उन्मळून पडल्याच्या घटना घडल्या. बुधवारी अग्निशमन दलाच्या कार्यालयात मदतीसाठी सतत फोन येत होते. काही ठिकाणी पडझडीमुळे वाहनांचे तसेच घरांचे नुकसानही झाले. वादळी वाऱ्यामुळे काही ठिकाणी वीजपुरवठा खंडित झाल्याने नागरिकांना गैरसोयींचा सामना करावा लागला.

वादळी वाऱ्यासह पडलेल्या पावसामुळे फातोर्डा येथे संरक्षक भिंतीवर मोठे झाड उन्मळून पडले. याशिवाय सेर्नाभाटी येथे माड रस्त्यासह वीजतारांवर पडला होता. सुदैवाने यात मोठे नुकसान झाले नाही. मडगाव अग्निशामक दलाने गेल्या २४ तासांत तीन वेगवेगळ्या आपत्कालीन कॉल्सना प्रतिसाद दिला. यात एका आत्महत्येच्या प्रयत्नाचा कॉलही होता.

कोलमोरोड, नावेली येथील मेलिंटन एन्क्लेव्ह येथे समीर शेख (४९) या इसमाने स्वतःवर पेट्रोल ओतून पेटवून घेण्याचा प्रयत्न करत असल्याची माहिती पोलिसांकडून पहाटे अग्निशामक दलाला देण्यात आली. त्वरित दलाच्या जवानांनी घटनास्थळी धाव घेतली असता तेथे कोणीही जखमी सापडले नाही. अन्य एका घटनेत फातोर्डा येथील स्विमिंग पूलजवळ स्टीलच्या कुंपणावर झाड उन्मळून पडले. जवानांनी झाड तोडून बाजूला करत पन्नास हजार रुपयांची मालमत्ता वाचवली.