डिचोली: उष्णतेचा पारा चढल्याने उकाडा असह्य होत असून, अंगाची लाही-लाही होऊ लागली आहे. अशा परिस्थितीत थंडगार पाण्याचा गारवा अनुभवण्यासाठी नागरिकांचा ओढा जलस्रोतांकडे वाढत आहे. डिचोली तालुक्यातील विविध भागांतील नदी, तलाव व बंधाऱ्यांवर सध्या आंघोळीसाठी मोठी गर्दी होत असल्याचे चित्र दिसून येत आहे.

शिरगाव येथील ‘धोंड तळी’ हे सध्या विशेष आकर्षण ठरत असून, येथे लहान मुलांसह युवकांचा मोठा जमाव दिसून येत आहे. रविवारी तर या तळीवर आंघोळीसाठी विशेष गर्दी झाली होती.

जत्रेपूर्वी काही दिवस सुरक्षेच्या कारणास्तव येथे आंघोळीस बंदी घालण्यात आली होती. मात्र, जत्रेनंतर ही तळी पुन्हा खुली करण्यात आल्यानंतर नागरिकांनी येथे गर्दी केली आहे.

गावातील तसेच परिसरातील मुले या तळीत डुबक्या मारत आंघोळीचा मनसोक्त आनंद लुटताना दिसत आहेत. ‘धोंड तळी’च्या पाण्यात औषधी गुणधर्म असल्याची स्थानिकांची धारणा असून, तळी सुरक्षित असल्यामुळे अनेकजण येथे येण्यास प्राधान्य देतात.

वाठादेव बंधाऱ्यावर आंघोळीस बंदी

डिचोली तालुक्यातील साखळी, कुडचिरे आदी ग्रामीण भागात जलस्रोत खात्याने उभारलेले काही बंधारेही आंघोळीसाठी आकर्षण ठरत आहेत. मात्र, कारापूर-सर्वण पंचायत क्षेत्रातील वाठादेव बंधाऱ्यावर सुरक्षेच्या कारणास्तव आंघोळीस बंदी घालण्यात आली आहे. गेल्या पंधरा वर्षांत या बंधाऱ्यात चारजणांचा बुडून मृत्यू झाल्याने हा बंधारा जीवघेणा ठरला आहे. त्यामुळे तेथे बंदी घातली आहे.