पणजी: कोट्यवधींच्या गुंतवणूक घोटाळा प्रकरणातील मुख्य संशयित मायरन रॉड्रिग्ज आणि त्याची पत्नी दीपाली परब उर्फ रुक्मिणी नाईक यांच्याविरोधात गोवा सरकारनं कडक पावलं उचलली आहेत. राज्याच्या वित्त विभागानं या प्रकरणी शुक्रवारी (११ एप्रिल) दोघांच्याही नावावर असलेली मालमत्ता आणि बँक खात्यातील ४१ लाख रुपयांहून अधिक रक्कम तत्काळ जप्त करण्याचा आदेश दिला आहे.

गोवा सरकारच्या वित्त विभागाचे प्रमुख सचिव डॉ. प्रणब भट यांनी हा आदेश जाहीर केला आहे. त्यांच्या आदेशानुसार, मायरन आणि दिपालीची मुंबई, पुणे, फातोर्डा, नुवे आणि कुठ्ठाळी (कुडचडे) येथील मालमत्ता जप्त करण्यात आली आहे.

याशिवाय, कल्याण-मुंबई आणि गोव्यातील विविध बँकांमध्ये असलेल्या ४१ लाखांहून अधिक रकमेच्या बँक ठेवी गोठवण्यात आल्या आहेत.

गुंतवणूक घोटाळा प्रकरणात मायरन रॉड्रिग्ज आणि त्याची पत्नी दीपाली परब यांच्यावर मोठे आरोप करण्यात आले होते. २०२३ साली गोवा पोलिसांच्या आर्थिक गुन्हे शाखेनं या प्रकरणात त्यांच्यावर गुन्हा दाखल केला होता.

तपासादरम्यान, या जोडप्याने गोव्यातील तब्बल ३८ गुंतवणूकदारांची जवळपास २५ कोटी रुपयांची फसवणूक केल्याचं समोर आलं होतं.

१३० कोटी रुपयांचे आर्थिक व्यवहार

प्राथमिक चौकशीत मायरन रॉड्रिग्जने २००९ ते १७ ऑगस्ट २०२३ या कालावधीत तब्बल १३० कोटी रुपयांचे आर्थिक व्यवहार केल्याचं निष्पन्न झालं.

तसेच, 'आयडीलीक गोवन गेटवेज' नावाच्या कंपनीत मायरनने सुमारे ३.२५ कोटी रुपयांची गुंतवणूक केल्याचं देखील समोर आलं होतं.