मडगाव : गोव्यातील उद्योगांना चांगल्या प्रकारे आपला व्यवसाय करता यावा यासाठी राज्यातील औद्योगिक वसाहतीत चांगल्या रस्त्यासारख्या प्राथमिक सुविधा देण्यासही सरकार उदासीन असल्याचा आरोप गोवा उद्योजक संघटनेचे अध्यक्ष दामोदर कोचकर यांनी केला असून त्यासाठी त्यांनी सरकारचा निषेधही केला आहे.

प्रशासन भ्रष्टाचाराने (Corruption) बरबटलेले असून त्याचा परिणाम उद्योजकांना भोगावे लागत असल्याचा आरोप त्यानी केला आहे. ही उदासीनता राज्याच्या औद्योगिक वाढीसाठी अडचणीची असल्याचे मत त्यांनी व्यक्त केले. गोव्यातील (Goa) सर्व औद्योगिक वसाहतीत रस्ते व्यवस्थित नसून कुंडई औद्योगिक वसाहतीत जे रस्ते आहेत त्यावरून वाहने चालविणेही शक्य नाही. ही गोष्ट सरकारच्या लक्षात आणून दिल्यावर या साठी 5 कोटी रुपयांची तरतूद करण्यात आली होती.

कुंडई रस्त्याचे काम तातडीने हाती घ्यावे अशी मागणी केलेली असताना सुरुवातीला निवडणूक आचारसंहितेचे कारण पुढे करून हे काम अडवून ठेवले. आता नवीन सरकार (Goa Government) स्थापन झाले तरी या कामाला सुरुवात झालेली नाही याकडे त्यांनी लक्ष वेधले. कामाच्या निविदेतील बोलीपेक्षा 20 टक्के कमी बोलीच्या एकापेक्षा जास्त निविदा आल्यास त्यावर अंतिम निर्णय घ्यायचा अधिकार औद्योगिक विकास महामंडळाच्या अध्यक्षांना आहे. नेमक्या याच तरतुदीचे कारण पुढे करून कामे अडवून ठेवली जात असल्याचा आरोप कोचकर यांनी केला आहे.