New school rules in Goa 2025

पणजी: गोवा सरकारने गोवा शालेय शिक्षण नियमावली, 2025 मध्ये सुधारणा प्रस्तावित केल्या असून, हरकती आणि सूचना सादर करण्यासाठी पाच दिवसांची मुदत दिली आहे.

या नव्या प्रस्तावानुसार, इयत्ता पहिली ते पाचवी आणि नववीचे वर्ग जून ते एप्रिलपर्यंत, तर इयत्ता सहावी ते दहावी आणि बारावीचे वर्ग एप्रिल ते मार्चपर्यंत चालणार आहेत. नवीन शैक्षणिक वर्ष सुरू होण्यापूर्वी एक आठवड्याची विश्रांती असेल.

उन्हाळी सुट्टी मे 1 पासून पाच आठवड्यांसाठी, दिवाळी सुट्टी ऑक्टोबर किंवा नोव्हेंबरमध्ये तीन आठवड्यांसाठी असेल. गणेश चतुर्थीसाठी एका आठवड्याची सुट्टी दिली जाऊ शकते, मात्र गमावलेले दिवस भरून काढावे लागतील. ख्रिसमस सुट्टी 24 डिसेंबर ते 2 जानेवारी या कालावधीत असेल. या बदलांबाबत शिक्षक, पालक आणि शिक्षण तज्ज्ञांकडून प्रतिक्रिया अपेक्षित आहेत.

राज्यात नवीन शैक्षणिक धोरणाची (एनईपी) अंमलबजावणी टप्‍प्‍याटप्‍प्‍याने करण्‍यात येत आहे. २०२३ पासून सुरू झालेली ही प्रक्रिया २०२८ पर्यंत पूर्णत: मार्गी लावण्‍याचे ध्‍येय शिक्षण संचालनालयाने नजरेसमोर ठेवले आहे. त्यामुळे नवनवीन निर्णय, बदल या धोरणाच्या अनुषंगाने घेतले जात आहेत.नवा अभ्यासक्रम, शिक्षकांना प्रशिक्षण, शैक्षणिक वर्ष बदल असे महत्त्वपूर्ण बदल होत आहेत. त्‍या माध्यमातून विद्यार्थ्यांच्‍या सर्वांगीण विकासाला प्राधान्य दिले जात आहे.