Sanjeevani Sugar Factory : दयानंदनगर-धारबांदोडा येथील संजीवनी साखर कारखान्याच्या विषयावरून गेले काही दिवस रणकंदन सुरू आहे. ऊस उत्पादकांचे आंदोलन त्यानंतर पगार वेळेवर मिळाला नाही आणि कामावरून कमी करण्याच्या सरकारच्या प्रयत्नांमुळे संजीवनीच्या कायमस्वरूपी व कंत्राटी कामगारांनी गेल्या आठवड्यात आंदोलन छेडले आणि सरकारला हा प्रश्‍न प्राधान्यक्रमाने हाती घ्यावा लागला.

त्यामुळेच संजीवनीच्या आर्थिक अनुदानाची मुदत आता सहा महिन्यांपर्यंत वाढवण्यात आली आहे.हे अनुदान पुढील सहा महिने किंवा जोपर्यंत कामगारांना स्वेच्छा निवृत्ती लागू होत नाही, तोपर्यंत देण्यात येईल, असे वित्त खात्याने स्पष्ट केले आहे.

शेवटी कामगारांवर टांगती तलवार कायम राहिली आहे. सद्यःस्थितीत संजीवनी कामगारांच्या पगारावर महिन्याकाठी साडे सत्तेचाळीस लाख रक्कम तर पाणी, वीज आदी देखभालीवर दीड लाख रुपये खर्च करावे लागतात.

सरकारने संजीवनी साखर कारखान्यासाठी सहा महिने अनुदान जाहीर केल्यानंतर गेले तीन महिने पगाराविना असलेल्या संजीवनीच्या कामगारांचा पगार शेवटी झाला.

संजीवनीच्या कायमस्वरूपी व कंत्राटी कामगारांचा पगार आणि संजीवनी प्रकल्पाच्या वीज, पाणी व इतर कामासाठी हे अनुदान देण्यात आले आहे. आता हे सहा महिने एप्रिलपासून धरण्यात आले आहेत.