पणजी: गोमंतक भंडारी समाजाला समांतर समितीत काम करण्यासाठी आता नेत्यांची शोधाशोध करण्याची वेळ आली आहे. ही समिती स्थापन व्हावी, यासाठी कार्यरत असलेल्या गटाने याच आठवड्यात समिती स्थापन केली जावी, यासाठी रेटा वाढवला आहे.

गोमंतक भंडारी समाज संघटनेला पर्यायी अशी समिती स्थापन करण्यासाठी मंगळवारचा दिवस निवडण्यात आला होता. त्या प्रस्तावित समितीमधील अनेकांनी माघार घेतल्याचे वृत्त ‘गोमन्तक’ने देताच नव्याने नावांची शोधाशोध सुरू करण्यात आली आहे. ती समिती स्थापन व्हावी, यासाठी सक्रिय असलेल्या नेत्याने दिवसभरात काहींच्या घरी जात समितीचे सदस्यत्व स्वीकारावे, अशी गळ घातल्याची खात्रीलायक माहिती मिळाली आहे.

गोमंतक भंडारी समाज संघटनेच्या अध्यक्षपदी देवानंद नाईक यांची निवड झाल्यानंतर ही समिती स्थापन करण्याचा विचार बळावत गेला आहे. भंडारी समाज राजकीय व सामाजिकदृष्ट्या प्रबळ ठरू शकतो, असे दिसून आल्याने त्यात फूट पाडण्यासाठी समांतर समितीच्या विचारांना अलीकडे बळ देण्यात येऊ लागले आहे. त्यातूनच मंगळवारी ही समिती जाहीर करण्यासाठी वेळ निवडण्यात आली होती. मात्र, ती पुढे ढकलण्याची वेळ आली.

गोमंतक भंडारी समाज संघटनेचे अध्यक्ष देवानंद नाईक म्हणाले, काही जणांना समाजात फूट पडलेली हवी आहे. समाज एकसंघ राहिला तर राजकीय व इतर हक्क मागितले जातील, याची भीती काहींना आहे. आमच्यापैकी काहीजण जातनिहाय जनगणनेसाठी निवेदने देत आहेत. ते कोणत्या अधिकारात अशी निवेदने देत आहेत ते त्यांचे त्यांनाच ठाऊक. भंडारी समाज हा इतर मागासवर्गीयांत असल्याने त्यात समावेश असलेल्या १९ समाजांनी ती मागणी केली पाहिजे. भंडारी समाजाची आमसभा मे मध्ये बोलावण्यात येणार आहे. त्याला कितीजण उपस्थित राहून मागणीचे समर्थन करतील त्यावरच बरेच काही अवलंबून आहे, असे ते म्हणाले.