Goa: पिळगाव (Pilgaon) येथील मारहाण प्रकरणाची गृहमंत्री या नात्याने राज्याचे मुख्यमंत्री डॉ. प्रमोद सावंत (CM Dr Pramod Sawant) यांनी गांभीर्याने दखल घ्यावी. या अमानुष मारहाण प्रकरणाची 'सीबीआय' चौकशी (CBI's inquiry) करावी. आणि आम्हाला न्याय मिळवून द्यावा. अशी मागणी मारहाण झालेल्या पिडीत पिळगावकर कुटुंबियातील (Victim Pilgaonkar Family) युवती श्रुष्टी पिळगावकर हिने आज मंगळवारी डिचोलीत घेतलेल्या पत्रकार परिषदेत केली आहे. यावेळी तिच्यासमवेत तीचे वडील सुनील आणि बहीण समता पिळगावकर उपस्थित होती. मारहाणीचा हा प्रकार मालमत्तेच्या वादातून नव्हे, तर क्षुल्लक कारणावरून घडला आहे, असेही श्रुष्टी हिने म्हटले आहे.

अमानुषपणे मारहाण

गेल्या बुधवारी 12 रोजी तारवाडा पिळगाव येथे मारहाणीचा हा प्रकार घडला आहे. आम्ही आणलेले दगड नेण्यास हरकत घेतल्यानेच पिळगावचे पंच स्वप्नील फडते आणि त्यांचे बंधू मनोहर फडते यांनी आपणासहित आपली आई, बहीण, काका आणि इतरांवर अमानुषपणे हल्ला चढवला. हल्ला करताना त्यांनी महिलांची विचार केला नाही. आमचा विनयभंगही केला. हल्ला करतानाची फडते बंधूंची आक्रमकता पाहता, केवळ दैव बलवत्तर म्हणून आम्ही बचावलो. असे श्रुष्टी पिळगावकर हिने सांगितले. पोलिसात केलेल्या तक्रारीनुसार पोलिसांनी गुन्हा नोंद करून संशयित फडते बंधूना अटक केली. संशयितांची सध्या सशर्त जामिनावर सुटका करण्यात आली आहे. आमच्यावर झालेला हल्ला पाहता, भविष्यात त्याची पुनरवृत्ती होण्याची शक्यता नाकारता येत नाही. अशी भीती श्रुष्टी पिळगावकर आणि तिच्या कुटुंबियाने व्यक्त केली आहे.

अपात्र करा

आमच्यावर अमानुषपणे हल्ला करणारे स्वप्नील फडते हे पिळगाव पंचायतीचे विद्यमान पंच आहेत. मारहाणीसारखे कृत्य करणाऱ्या स्वप्नील फडते यांना पंच पदावर राहण्याचा अधिकार नाही. त्यांना अपात्र करावे. अशी मागणीही पिळगावकर कुटुंबियाने केली आहे. पंचायत खाते आणि स्थानिक पंचायतीला मारहाण प्रकरणाची कल्पना देण्यात आली आहे. राज्य महिला आयोगालाही मेल पाठवून या घटनेची माहिती देण्यात आली आहे. असे श्रुष्टी पिळगावकर हिने सांगितले.