पणजी : गणेशोत्सवाच्या पार्श्वभूमीवर गणेशमूर्ती विक्रेत्यांच्या नोंदणीचा प्रश्न अखेर मार्गी लागण्याची शक्यता निर्माण झाली आहे. पर्यावरण व हवामान बदल विभागाचे संचालक सचिन देसाई यांनी गोवा राज्य प्रदूषण नियंत्रण मंडळाला पत्र पाठवून विक्रेत्यांच्या नोंदणीसाठी आवश्यक निर्देश तयार करण्याची प्रक्रिया सुरू असल्याचे स्पष्ट केले आहे.

हे निर्देश लवकरच जारी होण्याची अपेक्षा असून, तोपर्यंत विक्रेत्यांना नोंदणी करता यावी यासाठी नोंदणी संकेतस्थळ सुरू ठेवण्याची सूचना मंडळाला करण्यात आली आहे.

नोंदणीची तारीख संपून जाऊनही अनेकांनी नोंदणी केलेली नाही. त्यांनी प्रयत्न करूनही नोंदणी करता येत नव्हती, असे वृत्त गोमन्तकने दिले होते. त्याची दखल घेत या हालचाली सुरू झाल्याची माहिती सूत्रांनी दिली.

गणेशमूर्ती विक्रेत्यांच्या नोंदणीसंदर्भात गोवा राज्य प्रदूषण नियंत्रण मंडळाने ३० जुलै रोजी पर्यावरण विभागाला पत्र पाठवण्यात आले होते. त्याला उत्तर देताना पर्यावरण विभागाने १० ऑगस्ट रोजी भूमिका स्पष्ट केली.

प्रक्रिया सुलभ करण्याची गरज

गणेशमूर्ती तयार करणे, त्यांची विक्री आणि पर्यावरणपूरक विसर्जन याबाबत शासनाकडून घालण्यात येणाऱ्या अटींच्या पार्श्वभूमीवर ही नोंदणी महत्त्वाची मानली जात आहे. आगामी गणेशोत्सवाच्या तयारीला वेग येत असताना पर्यावरणपूरक गणेशोत्सवासाठी शासनाच्या नियमांची अंमलबजावणी करताना विक्रेत्यांना अनावश्यक अडचणी येऊ नयेत, यासाठी नोंदणी प्रक्रिया सुलभ करण्याची गरजही व्यक्त होत आहे.