Goa Coconut Prices: गणेशचतुर्थीच्या आधी नारळाच्या दरवाढीला लगाम; फलोत्पादन महामंडळ ‘ना नफा, ना तोटा’ तत्त्वावर करणार विक्री

पणजी: गणेशचतुर्थीच्या काळात नारळाची मागणी मोठ्या प्रमाणात वाढत असल्याच्या पार्श्वभूमीवर गोवा फलोत्पादन महामंडळाने नागरिकांना रास्त दरात नारळ उपलब्ध करून देण्याचा निर्णय घेतला आहे. ‘ना नफा, ना तोटा’ तत्त्वावर नारळविक्री करण्यात येणार असून, सणाच्या काळात नारळाचा तुटवडा भासू नये आणि वाढलेल्या बाजारभावाचा अतिरिक्त आर्थिक भार ग्राहकांवर पडू नये, हा या उपक्रमामागील उद्देश आहे.

महामंडळाचे अध्यक्ष तथा आमदार प्रेमेंद्र शेट यांनी विधानसभेच्या आवारात माध्यमांशी बोलताना ही माहिती दिली. गणेश चतुर्थीच्या काळात धार्मिक विधी, पूजाविधी आणि अन्य सणासंबंधी तयारीसाठी नारळाची मोठ्या प्रमाणात आवश्यकता असते. त्यामुळे या काळात मागणी वाढून दर आणखी वाढण्याची शक्यता असते. ही बाब लक्षात घेऊन महामंडळाने यंदाही नारळविक्री करण्याचा निर्णय घेतल्याचे शेट यांनी सांगितले.

बाजारात नारळाच्या दरात सध्या वाढ झाल्याने चतुर्थीच्या काळात ग्राहकांना त्याचा मोठा फटका बसण्याची शक्यता आहे. अशा परिस्थितीत महामंडळाच्या माध्यमातून वाजवी दरात नारळ उपलब्ध झाल्यास सर्वसामान्य ग्राहकांना दिलासा मिळण्याची अपेक्षा आहे. राज्यातील नागरिकांना सणासुदीच्या काळात आवश्यक प्रमाणात नारळ उपलब्ध व्हावा, यासाठी महामंडळाकडून नियोजन करण्यात येत आहे.

नंतरच करणार विक्रीचा दर निश्चित

गेल्या वर्षी राज्यात नारळाचे मोठ्या प्रमाणात नुकसान झाले होते. त्यामुळे चतुर्थीच्या काळात संभाव्य तुटवडा लक्षात घेऊन फलोत्पादन महामंडळाने प्रथमच रास्त दरात नारळ उपलब्ध करून दिले होते. गेल्या वर्षी महामंडळाकडून सुमारे दोन लाख नारळांची विक्री करण्यात आली होती. त्यावेळी प्रतिनारळ ४० रुपये दर आकारण्यात आला होता.

यंदाही चतुर्थीच्या पार्श्वभूमीवर नारळविक्री केली जाणार आहे. चतुर्थीपूर्वी सुमारे आठ दिवस महामंडळाच्या गाळ्यांवर नारळ विक्रीसाठी उपलब्ध करून देण्यात येतील. यंदा नारळ ज्या दराने खरेदी केले जातील, त्यानुसार विक्रीचा दर निश्चित केला जाणार असल्याची माहिती महामंडळाचे व्यवस्थापकीय संचालक चंद्रहास देसाई यांनी दिली.