पणजी: सुमारे १३० कोटींच्या कथित शेअर मार्केट घोटाळ्यामधील संशयित मायरन रॉड्रिग्ज याची सुमारे ३ कोटींची मालमत्ता सक्तवसुली संचालनालयाने (ईडी) मनी लाँडरिंग प्रतिबंधक कायद्याच्या तरतुदीअंतर्गत जप्त केली आहे. त्याच्याविरुद्ध काही दिवसांपूर्वी ‘ईडी’ने अटकेसाठी ब्ल्यू कॉर्नर नोटीस जारी केली आहे. तो लंडन येथे असल्याने त्याला भारतात आणण्यासाठी हालचाली सुरू झाल्या आहेत, अशी माहिती ‘ईडी’ सूत्राने दिली.

‘ईडी’ने संशयित मायरन रॉड्रिग्ज याची मालमत्ता जप्त केली आहे, त्यामध्ये सासष्टी येथील सुमारे २१.९० लाखांचा १३९.३३ चौ.मी. क्षेत्रफळ असलेल्या एकमजली इमारत कॉम्प्लेक्समध्ये असलेला रेनबो व्हिला, १ कोटी ४४ लाखांचा वडाळा-मुंबई येथे ४५६ चौ. फूट असलेला फ्लॅट, सासष्टी येथे असलेला ९५.२० लाखांचा सर्व्हे क्रमांक ४१/१-ए मध्ये असलेला भूखंड तसेच दीपाली परब हिच्या नावाने एचडीएफसी बँकेत ठेव असलेल्या तीन वेगवेगळ्या रकमा यांचा समावेश आहे.

जादा व्याजाचे आमिष दाखवून गंडा

संशयित मायरन रॉड्रिग्ज व त्याची पत्नी दीपाली परब यांनी सासष्टीतील अनेक लोकांना गुंतवणुकीवर जादा व्याज देण्याचे आमिष दाखवून कोट्यवधींना गंडा घातला आहे. याप्रकरणी आर्थिक गुन्हे कक्षाने गुन्हा दाखल करून तपास सुरू केला होता. या प्रकरणाचा तपास सध्या गुन्हे शाखेकडे देण्यात आला आहे. चौकशीसाठी संशयित मायरन याची घटस्फोटीत पत्नी सुनीता रॉड्रिग्ज हिला गुन्हे शाखेने बोलावले होते. मात्र, ती सहकार्य करत नसल्याने तिला अटक करण्यात आली आहे. या घोटाळ्यातील रक्कमेचा स्रोत शोधून काढण्यासाठी तसेच त्याचा वापर मनी लाँडरिंगसाठी (Money Laundering) केल्याच्या संशयावरून ‘ईडी’नेही त्यांची चौकशी सुरू केली आहे.