Goa News: विधानसभा निवडणुकीवेळी गृहमंत्री अमित शहा यांना खाण पट्ट्यात फिरवून गोव्यात भाजप सत्तेवर आल्यास सहा महिन्यांत खाणी सुरू करू, असे सांगणाऱ्या भाजपला आश्वासनांचा विसर पडला का, असा सवाल गोवा फॉरवर्ड पक्षाचे अध्यक्ष विजय सरदेसाई यांनी केला आहे. या सरकारला खाणी सुरू करण्यापेक्षा विरोधी पक्षांचे आमदार फोडण्यातच स्वारस्य आहे, अशी टीकाही त्यांनी केली.

प्रमोद सावंत यांनी मुख्यमंत्री पदाचा ताबा घेऊन आज सहा महिने पूर्ण झाले. त्या पार्श्‍वभूमीवर सरदेसाई यांनी मुख्यमंत्र्यांना त्यांच्या आश्वासनाची आठवण करून देताना, ‘आजपासून खाणी सुरू होणार का?’ असा सवाल ‘ट्विट’द्वारे केला आहे. सत्तेवर आल्यानंतर या सरकारने खनिज महामंडळ स्थापन करून खाणी परत सुरू करणार, असे सांगितले होते. मात्र, त्या दृष्टीने कोणतेच प्रयत्न झालेले नाहीत.

खनिज पट्ट्यातील लोक भुकेल्या अवस्थेत आहेत. आमदार फोडण्यात वेळ घालविण्याऐवजी खाणींचा लिलाव करून त्या सुरू करण्यात तत्परता दाखवावी. हा लिलाव करताना पूर्ण ब्लॉकचा लिलाव न करता प्रत्येक खाणीचा वेगळा लिलाव करावा, जेणेकरून सगळ्या खाणी कुणा एकाच्याच घशात जाण्यापासून वाचतील, अशी प्रतिक्रियाही सरदेसाई यांनी व्यक्त केली.

लोकांचा सरकारवर वचक नाही: पुती गावकर

खाणी सुरू व्हाव्यात यासाठी लोकांनी सरकारवर दबाव आणण्याची गरज होती; पण लोकांचाच सरकारवर वचक नाही, अशी प्रतिक्रिया मायनिंग पीपल्स फ्रंटचे निमंत्रक पुती गावकर यांनी व्यक्त केली. गावकर म्हणाले, आम्ही खाणी सुरू व्हाव्यात, यासाठी लोकांनी काय करावे, यासंबंधी जागृती केली.

खाणी सुरू होत नसल्याबद्दल लोकांच्या मनात खदखद आहे. मात्र, लोकांना सरकारी नोकरीचे आमिष दाखविले की निवडणूक जिंकता येते, हे सत्ताधाऱ्यांच्या लक्षात आले आहे. त्यामुळेच सरकार बेफिकीर आहे, अशी प्रतिक्रिया त्यांनी व्यक्त केली.