Goa News: वीज ट्रान्स्फॉर्मरअभावी फोंड्यातील नवीन मार्केट संकुल पूर्णपणे वापरात येत नसल्याने येत्या काही दिवसांत ट्रान्स्फॉर्मर उभारल्यानंतर हे मार्केट संकुल पुन्हा गजबजेल, असे फोंड्याचे आमदार तथा राज्याचे कृषिमंत्री रवी नाईक यांनी सांगितले. काल (रविवारी) दिवाळीच्या पूर्वसंध्येला रवी नाईक यांनी मार्केट संकुलाला भेट देऊन पाहणी केली व संबंधितांना आवश्‍यक सूचना केल्या. (Goa News)

फोंड्यातील बुधवारपेठचे हे नूतन मार्केट संकुल रवी नाईक यांनीच उभारले होते, पण नंतरच्या काळात रवी नाईक हे आमदार नसल्याने या मार्केट संकुलाच्या प्रकल्पाचा पुढील विचार झालाच नाही, त्यामुळेच अनेक सुविधांअभावी हे मार्केट संकुल अर्धवटच खुले राहिले. विशेष म्हणजे या मार्केट संकुलाला वीज ट्रान्स्फॉर्मरची आवश्‍यकता आहे.

त्यासाठी फोंडा पालिकेने पुढाकार घेतला असून वीज खात्याकडे सातत्याने संपर्क करून वीज ट्रान्स्फॉर्मर उभारण्यासाठी कार्यवाही सुरू केली आहे. रवी नाईक यांच्या मार्गदर्शनाखाली हे मार्केट संकुल पुन्हा एकदा पूर्णपणे कार्यरत राहणार आहे.

तसेच,त्यामुळे विक्रेता आणि ग्राहकांची चांगली सोय होईल, अशी अपेक्षा व्यक्त करण्यात येत आहे. रवी नाईक यांची बुधवारपेठ मार्केटमधील व्यापाऱ्यांनी भेट घेऊन समस्यांसंबंधी चर्चा केली, त्यावर लवकरच यावर तोडगा काढला जाईल, अशी ग्वाही रवी नाईक यांनी दिली.

दिवाळीसाठी केली खरेदी

रवी नाईक यांनी बाजार संकुलातील विक्रेत्यांकडून दिवाळीसाठी खरेदीही केली. विक्रेत्यांचे प्रश्‍न त्यांनी यावेळी समजून घेतले. फोंड्यातील मार्केट संकुलात तालुक्यातील ग्राहक खरेदीसाठी येतात, त्याचबरोबर फोंड्यासह धारबांदोडा व सत्तरी तालुक्यातील विक्रेतेही बाजारात माल घेऊन येत असल्याने या लोकांना चांगल्या सुविधा उपलब्ध करून देण्यास आपण कटिबद्ध असल्याची ग्वाही रवी नाईक यांनी दिली.

मार्केटवर शेड उभारणीचे काम

नवीन मार्केट संकुलाच्या स्लॅबवर सध्या शेड उभारणीचे काम सुरू असून त्यानंतर याठिकाणी विक्रेत्यांना स्थलांतर करण्यात येणार आहे. त्यानंतर मासळी मार्केटच्या ठिकाणी अद्ययावत सुविधांनी युक्त नवीन मार्केट संकुल उभारणीचे काम सुरू करण्यात येईल, असे नगराध्यक्ष रितेश नाईक यांनी सांगितले. फोंडा पालिकेकडून फोंडावासीयांना चांगले ते देण्याचा सातत्याने प्रयत्न केला जात असल्याचेही नगराध्यक्षांनी यावेळी स्पष्ट केले.