पणजी: ‘‘अबकारी खात्यातील तोतया आयुक्त प्रकरणात गुंतलेल्‍यांची सखोल चौकशी करण्याचे आदेश पोलिसांना दिले आहेत. संबंधित व्यक्ती कोणासोबत फिरत होती? कुठे जात होती? याची माहिती घेऊन या प्रकरणातील दोषींवर कडक कारवाई केली जाईल.

शिवाय, दोषींची मालमत्ता देखील जप्त केली जाईल’’, असे मुख्‍यमंत्री डॉ. प्रमोद सावंत यांनी शनिवारी स्‍पष्‍ट केले. राज्‍य मंत्रिमंडळ बैठकीनंतर पत्रकार परिषदेत ते बोलत होते. ‘‘सुशिक्षित लोक अशा फसवणुकीला बळी पडत आहेत, ही दुर्दैवी बाब आहे.

सरकारी नोकरीच्या दाव्यांवर विश्वास ठेवण्यापूर्वी लोकांनी सावधगिरी बाळगावी’’ असे आवाहनही मुख्यमंत्र्यांनी केले. मनोज तळेकर नावाच्या व्यक्तीला सरकारी नोकरीचे आमिष दाखवून अजित शंखवाळकर नावाच्या संशयिताने त्याच्याकडून २७ लाख रुपये उकळले होते.