थिवी: गोव्याला शैक्षणिक हब बनवण्याचा सरकारचा प्रयत्न आहे. थिवी मतदारसंघात येणाऱ्या काळात एमआयटी विद्यापीठ प्रकल्प आल्यास परिसरातील तरुणांना नोकरीच्या संधी उपलब्ध होतील. शिक्षकांच्या नोकऱ्या सोडल्या, तर इतर सर्व प्रकारच्या नोकऱ्यांसाठी (शिक्षकेतर) स्थानिकांनाच संधी देण्यात येईल, असे मुख्यमंत्री प्रमोद सावंत यांनी आज जाहीर केले.

माडेल थिवी येथील सुशोभीकरणाच्या कामाच्या उद्‌घाटनप्रसंगी ते बोलत होते. सरकारच्या ‘डबल इंजिन’मधील दोन प्रमुख व्यक्ती खासदार सदानंद शेट तानावडे व मंत्री नीलकंठ हळर्णकर हे थिवी मतदारसंघातील आहेत. त्यामुळे थिवीचा चौफेर विकास केला जाणार आहे.

माडेल थिवी येथील श्री महागणपती देवस्थानच्या सभोवतालच्या परिसराचे सुशोभीकरणासाठी सरकारतर्फे पावणेतीन कोटी रुपये खर्च करण्यात येतील, असेही त्यांनी यावेळी जाहीर केले. यावेळी व्यासपीठावर पर्यटनमंत्री रोहन खंवटे, मच्छीमारमंत्री नीळकंठ हळर्णकर, राज्यसभा खासदार सदानंद शेट तानावडे, जिल्हा पंचायत सदस्य दीक्षा कानोळकर, पर्यटन खात्याचे संचालक केदार नाईक, देवस्थानचे अध्यक्ष घनश्याम आरोसकर उपस्थित होते.

सदानंद शेट तानावडे म्हणाले, की मुख्यमंत्र्यांनी थिवी मतदारसंघाकडे लक्ष दिल्याने लवकरच सिरसई ते अस्नोडापर्यंतचा बगलमार्ग पूर्ण होणार आहे. हा रस्ता पूर्ण झाल्यानंतर म्हापशाहून डिचोलीला जायला फार कमी वेळ लागेल.