वास्को: दूधसागर नदीत बुडून मरण पावलेल्या हिराण्णा, रामाण्णा व लक्ष्मण यांचे पार्थिव नवे वाडे येथे रविवारी सकाळी साडेदहाच्या सुमारास आणल्यावर त्यांच्या आईने काळीज पिळवटून टाकणारा हंबरडा फोडला. यावेळी उपस्थितांची मनेही हेलावली.

अनेकांचे डोळे पाणावले. नवे वाडेच्या चाळीसमोर काही वेळ त्यांचे पार्थिव अंत्यदर्शनासाठी ठेवल्यावर खारीवाडा येथील हिंदू स्मशानभूमीत त्यांच्यावर अंत्यसंस्कार करण्यात आले. नवे वाडे येथील विजय साजिली याचे पार्थिव त्यांच्या मूळ गावी नेण्यात येणार आहे.

दूधसागर नदीत पोहण्यासाठी उतरलेल्या पाचपैकी चारजण शनिवारी (ता.१३) सकाळी बुडाले होते. त्यामध्ये हिराण्णा मदार (२१), रामाण्णा मदार(१९), लक्ष्मण मदार(१९) हे तीन सख्खे भाऊ मरण पावले होते. त्यापैकी रामाण्णा व लक्ष्मण हे जुळे होते.

नवे वाडे येथे राहणारा विजय साजिली(२०) हा त्यांचा मित्रही त्यांच्यासह बुडाला होता. राहुल हरिजन(२०) हा सुदैवाने बचावला. हिराण्णा, रामाण्णा, लक्ष्मण व विजय यांच्या मृतदेहांचे शवविच्छेदन करण्यात आल्यावर पार्थिव नातेवाईकांच्या स्वाधीन करण्यात आले.

हिराण्णा, रामाण्णा व लक्ष्मण यांचे पार्थिव घेऊन दोन शववाहिका जेव्हा नवे वाडेत आल्या. त्यांच्या घरापर्यंत शववाहिका नेणे शक्य नसल्याने त्या शववाहिका तेथील चाळीसमोर ठेवण्यात आल्या. यावेळी त्यांच्या नातेवाईक, शेजारी तसेच इतर नागरिकांनी एकच गर्दी केली होती. आपल्या तीनही मुलांचे पार्थिव पाहताच त्यांच्या आईने मोठा हंबरडा फोडला. ती या घटनेबद्दल देवाला जाब विचारत होती.

वडिलांकडून अंत्यविधी; उपस्थितांना अश्रू अनावर

खारीवाडा येथे पार्थिव आणल्यावर तेथे त्या तिघांचे वडील पारशू मदार यांनी अंत्यसंस्कार केले. तेव्हा तेथे उपस्थित नागरिकांना आपले अश्रू अनावर झाले. यावेळी विविध स्तरातील नागरिक उपस्थित होते.