म्हापसा: शहरात शनिवारी (१ फेब्रुवारी) रात्री उशिरा एका मद्यधुंद तरुणानं रस्त्यावर गोंधळ घालत वाहतुकीस अडथळा निर्माण केल्याची घटना समोर आली आहे. घटनेची माहिती मिळताच, म्हापसा पोलिसांनी घटनास्थळी धाव घेत तरूणाला ताब्यात घेतलं आहे.

तरुण मद्यधुंद अवस्थेत असताना रस्त्यावर गोंधळ घालत होता. सार्वजनिक ठिकाणी आरडाओरडा करत होता. तरूणाच्या गोंधळामुळे परिसरात काही काळ वाहतूक कोंडी झाली होती. ही घटना शनिवारी रात्रीच्या दरम्यान घडली.

घटनेची माहिती मिळताच, म्हापसा पोलिसांनी घटनास्थळी धाव घेतली आणि तरुणाला समजवण्याचा प्रयत्न केला. मात्र, त्याने पोलिसांशीही उद्धट वर्तन केल्यानं अखेर त्याला ताब्यात घेण्यात आलं.

संबंधित तरुणाविरोधात सार्वजनिक ठिकाणी गोंधळ घालण्याचा आणि वाहतुकीस अडथळा निर्माण करण्याचा गुन्हा दाखल होण्याची शक्यता आहे. पोलिसांकडून तरुणाची चौकशी सुरू असून पुढील कायदेशीर प्रक्रिया सुरू आहे.

गोव्यात मद्यधुंद पर्यटक आणि स्थानिक तरुणांकडून सार्वजनिक ठिकाणी गोंधळ घालण्याच्या घटनांमध्ये वाढ होत आहे. त्यामुळे पोलिसांनी अशा घटनांवर अधिक कठोर कारवाई करावी, अशी मागणी नागरिकांकडून होत आहे.