मडगाव: कोलवा पोलिसांच्या नाकावर टिच्चून रविवारी सायंकाळी फात्राडे-वार्का आणि बाणावली येथे मिळून तब्बल तीन धीरयो यशस्वीरीत्या आयोजित करण्यात आल्या.

या झुंजी पाहण्यासाठी मोठ्या संख्येने बघ्यांनी गर्दी केली होती. विशेष म्हणजे, राज्यात धीरयोवर कायद्याने बंदी असतानाही खुलेआम झुंजी आयोजित करण्यात आल्याने पोलिसांच्या कारवाईवर प्रश्नचिन्ह निर्माण झाले आहे.

या प्रकरणी कोलवा पोलिस ठाण्याशी संपर्क साधला असता, ‘काहीच घडले नाही,’ असे सांगत पोलिसांनी नेहमीप्रमाणे या प्रकाराकडे कानाडोळा केला. त्यामुळे बंदी असतानाही धीरयो आयोजकांचे मनोबल वाढत असल्याची चर्चा परिसरात सुरू आहे.

या धीरयोमध्ये लाखो रुपयांच्या पैजा लावण्यात आल्याची माहिती आहे. धीरयोवर कायद्याने बंदी असतानाही सर्व नियम धाब्यावर बसवून अशा झुंजी खुलेआम आयोजित केल्या जातात. या झुंजींसाठी आयोजकांकडून आधीच पोलिसांशी ‘सेटिंग’ केली जात असल्याची चर्चा असून, त्यामुळेच कारवाई होत नसल्याचा आरोप स्थानिकांकडून केला जात आहे.

धीरयोदरम्यान यापूर्वी गंभीर दुर्घटना घडल्या आहेत. माजोर्डा येथे उधळलेल्या रेड्याने शिंगाने भोसकल्याने राजेश निस्तानी या युवकाचा मृत्यू झाला होता. तर बाणावली येथे एक बैल पळत जाऊन समुद्रात बुडाल्याची घटनाही घडली होती. या घटनांनंतरही धीरयोचे आयोजन सुरूच असल्याने प्रशासनाच्या भूमिकेबाबत संताप व्यक्त होत आहे.