पणजी: गोवा पोलिस महासंचालक आलोक कुमार यांनी राज्यातील क्लब मालकांना चांगलीच तंबी दिली आहे. कायदा आणि सुव्यवस्था हातात घेतल्यास सक्त कारवाई केली जाईल, असा सूचना वजा इशारा कुमार यांनी दिला आहे. वाराणसी येथील पर्यटकांना झालेल्या मारहाणीच्या घटनेनंतर महासंचालकांनी क्लब मालक आणि बाऊन्सर्सना इशारा दिला.

पोलिस महासंचालक आलोक कुमार यांनी पर्यटन क्षेत्रात कार्यरत असेलल्या सर्वांशी बैठक घेऊन याबाबत चर्चा करणार असल्याचे म्हटले आहे. पर्यटकांसोबत वादविवाद झाल्यास क्लबमधील बाऊन्सर्सनी काय करावे याबाबत नियमावली ठरवून दिली जाईल, असे कुमार यांनी स्पष्ट केले.

“क्लबमध्ये कायदा आणि सुव्यवस्था राखण्यासाठी क्लबकडून एसओपी तयार करण्यात यावी आणि बाऊन्सर्सना प्रशिक्षण द्यावे”, असे कुमार म्हणाले.

वागातोर येथे एका नाईट क्लबमध्ये वाराणसीच्या पर्यटकांना मारहाण झाल्याची घटना रविवारी उघडकीस आली. याप्रकरणावरुन पोलिस महासंचालक आलोक कुमार यांनी राज्यातील क्लबना सूचना दिली आहे.

“क्लबमध्ये वेगवेगळ्या प्रकारचे पर्यटक भेट देत असतात त्यामुळे तेथे बाऊन्सर्सची गरज असते. काहीवेळा त्यांना मध्यस्थी करावी लागते”, असे कुमार म्हणाले.

बाऊन्सर्सना परिस्थिती कशी हाताळावी याची माहिती असावी. परिस्थिती हाताबाहेर गेल्यास पोलिसांना कल्पना द्यावी. पोलिसांना माहिती न देता कायदा हातात घेतल्यास योग्य ती कायदेशीर कारवाई केली जाईल, असा इशारा आलोक कुमार यांनी दिली.

येत्या काळात राज्यात पर्यटकांची संख्या वाढणार आहे. यापार्श्वभूमीवर उत्तर गोवा अधिक्षकांना पर्यटन क्षेत्रात कार्यरत असणाऱ्यांसोबत बैठक घेण्याची सूचना केलीये. पर्यटकांना कशा पद्धतीने हाताळावे याबाबत त्यांना मार्गदर्शन करण्याची सूचना करण्यात आली आहे.

ओशनमॅन इव्हेंटबाबत आयपीएस अधिकाऱ्याचा दबाव होता या पर्यटनमंत्र्यांनी केलेल्या आरोपाचे पोलिस महासंचालक आलोक कुमार यांनी खंडन केले आहे.