Goa News : गोवा हे जागतिक पर्यटनस्थळ आहे. मात्र, मागील दहा वर्षांत गोव्यात ड्रग्सचा सुळसुळाट, फोफावलेला वेश्या व्यवसाय, खंडणी यासारख्या प्रकारांमुळे गोव्याची बदनामी होत आहे. सरकारने केवळ ड्रग्सचे सेवन करणाऱ्यांवर कारवाई करण्यापेक्षा मूळ ड्रग्सचे नेटवर्क उद्ध्वस्त करावे, अशी मागणी काँग्रेसने केली आहे.

तसेच राज्यातील वाढत्या गुन्हेगारीसंदर्भात काँग्रेसच्या शिष्टमंडळातर्फे पोलिस महासंचालकांना निवेदन सादर करण्यात येणार आहे. यासंदर्भात काँग्रेसचे सरचिटणीस विजय भिके म्हणाले की, अलीकडे पर्यटक हे गोव्यात ड्रग्सचे सेवन करण्यासाठी येऊ लागलेत. राज्याच्या कानाकोपऱ्यात, गावागावांत ड्रग्स पोहचले आहे. किनारी भागात अक्षरशः ड्रग्सच्या माफियांनी उच्छाद मांडला आहे. विशेष म्हणजे, कोलवाळ मध्यवर्ती कारागृहातून ड्रग्सचा व्यवहार चालतोय.

कायदा-सुव्यवस्था ढेपाळली

मध्यंतरी, कळंगुटचे आमदार मायकल लोबो यांनी ड्रग्स व्यवहाराशी निगडित नावे व इतर माहिती आपल्याकडे आहे, असे सांगितले होते. अशावेळी पोलिसांनी लोबोंची चौकशी करून त्यांच्याकडून माहिती गोळा करावी. सध्या गोव्यातील वाढते गुन्हे, ड्रग्स बनविणारी रासायनिक प्रयोगशाळा सापडणे, ही चिंतेची बाब आहे. तसेच बिनदिक्कतपणे चालणाऱ्या ड्रग्स व्यवहारामुळे येथील कायदा-सुव्यवस्थाही ढेपाळली आहे, हेच अधोरेखित होते, असा आरोप भिके यांनी यावेळी केला.