पणजी: राज्‍यातील दाबोळी विमानतळाची टर्मिनल इमारत आणि इतर कामांसाठी केंद्र सरकारकडून २५५.६९ कोटींचा निधी मंजूर करण्‍यात आला असल्‍याची माहिती केंद्रीय विमानोड्डाणमंत्री राजीव प्रताप रुडी यांनी लोकसभेतील लेखी प्रश्‍‍नाच्‍या उत्तरातून दिली आहे.

विमान प्रवाशांची वाढती संख्‍या लक्षात घेऊन केंद्र सरकारने गोव्‍यासह विविध राज्‍यांतील विमानतळांवरील सोयी–सुविधा वाढवण्‍याचे प्रयत्‍न गेल्‍या काही वर्षांपासून सुरू केलेले आहेत. त्‍यासाठी देशभरातील २३ विमानतळांसाठी सुमारे १७ हजार कोटी रुपयांचा निधी जारी केला आहे.

त्‍यात गोव्‍यातील दाबोळी विमानतळावरील टर्मिनल इमारत आणि इतर कामांसाठी २५५.६९ कोटींचा निधी मंजूर करण्‍यात आला असल्‍याचे मंत्री रुडी यांनी उत्तरातून जारी केलेल्‍या आकडेवारीतून दिसून येते.

दाबोळी बंद होणार नाही !

दरम्‍यान, मोपा येथील मनोहर आंतरराष्‍ट्रीय विमानतळ सुरू झाल्‍यापासून दाबोळी विमानतळ बंद होण्‍याचा दावा विरोधकांकडून वारंवार केला जात आहे.

राज्‍याला दोन विमानतळांची गरज असल्‍यामुळे मोपा आणि दाबोळी ही दोन्‍ही विमानतळे सुरू राहतील, अशी हमी मुख्‍यमंत्री डॉ. प्रमोद सावंत यांनी दिलेली असतानाही प्रत्‍येक विधानसभा अधिवेशनात विरोधकांकडून हा विषय उपस्‍थित केला जात आहे. या पार्श्वभूमीवर, केंद्राने दाबोळी विमानतळाच्‍या विकासासाठी २५५.६९ कोटींचा निधी मंजूर केला आहे.