Goa Cyber Crime

पणजी: गेल्या पाच महिन्यात गोव्यातील सायबर गुन्ह्यांचे प्रमाण घटल्याचे गोवा पोलिसांनी म्हटले आहे. गुन्हे शाखेच्या पोलिस अधीक्षक राहुल गुप्ता यांनी दिलेल्या माहितीनुसार, जानेवारी ते मे २०२४ च्या तुलनेत जून ते ऑक्टोबर दरम्यान सायबर गुन्ह्यात घट झालीय. पोलिसांनी राबवलेल्या जनजागृती मोहिमेचा फायदा झाल्याचे गुप्ता म्हणाले.

जानेवारी - मे च्या तुलनेत जून ते ऑक्टोबर दरम्यान सायबर गुन्ह्यात ३३.२ टक्के घट झाल्याचे राहुल गुप्ता यांनी सांगितले. याकाळात फ्रॉड व्यवहार रोखण्याचे २४२ टक्के असल्याचेही त्यांनी सांगितले. सायबर गुन्हेगारी विरोधात राबवलेल्या जनजागृती मोहिमेमुळे अशा घटना कमी झाल्याचा दावा गुप्तांनी केला.

सायबर गुन्ह्यांचे स्वरुप, प्रकार आणि विविध घटनांबाबत जनजागृती करण्यासाठी पोलिसांनी सायबर सुरक्षित गोंय मोहिम राबवली. यासाठी पंचायत, शाळा, महाविद्यालये आणि उद्योगांची मदत घेतली. महाविद्यालयांच्या विद्यार्थ्यांनी मोठ्या प्रमाणावर या जनजागृती मोहिमेत सहभाग घेतला. सोशल मिडियाची देखील बहुमोल मदत झाल्याचे पोलिसांनी सांगितले.

सायबर गुन्ह्यांवर लक्ष ठेवण्यासाठी तसेच असे प्रकार उघडकीस आल्यास तात्काळ कारवाई करण्यासाठी विशेष टीमची स्थापना करण्यात आली आहे. गोवा पोलिसांनी विविध सायबर गुन्ह्यात राजस्थान, पश्चिम बंगाल, केरळ, हैद्राबाद आणि दिल्ली या राज्यातून ४६ जणांना अटक केलीय.

सायबर गुन्ह्याचे विविध प्रकार समोर येत आहेत. नागरिकांना पैशाचे आमिष देऊन व्हॉट्सअप ग्रुप किंवा टेलिग्राम चॅनेलमध्ये एड केले जाते. यातून आर्थिक फसवणूक होते. याशिवाय हॅकिंग, ओटीपी शेअरिंग यासारख्या प्रकारातून फसवणूक होते, असे पोलिस म्हणाले.