Goa Crime: मडगाव रेल्वे स्थानकावर शनिवारी विक्रीसाठी आणलेल्या आठ महिन्यांच्या चिमुकल्याचा सौदा करण्यासाठी दोन मध्यस्थ महिलांनी मदत केली होती. मात्र, या दोघींनाही प्रत्येकी एक लाख रुपयांचा मोबदला मिळावा, असा हट्ट धरला होता. पैसे मिळत नसल्याचे पाहून त्यांच्यात वाद होऊनच प्रकरणाला वाचा फुटली.

सूत्रांनी सांगितले, की बेल्लारी येथील आसिफ खान टपालवाले हा आपल्या तान्ह्या बाळाला घेऊन शनिवारी रात्री मडगाव रेल्वे स्थानकावर आला होता. एका कंत्राटदाराला तीन लाखांना हे बाळ विकण्याचे ठरले होते.

त्यातील 80 हजार त्या बाळाच्या वडिलांना, 20 हजार रुपये बाळाच्या आजीला तर राहिलेले 2 लाख रुपये त्या दोन्ही मध्यस्थ महिलांना, असे हे गणित होते. पण हा सौदा मान्य न झाल्यानेच त्या महिलांनी वाद घालण्यास सुरवात केली.

त्याच वेळी आरपीएफचा एक पोलिस तिथून जात होता. त्याच्या कानी हा वाद पडल्याने त्याने या सर्वांना पोलिस स्थानकावर आणले. या प्रकरणी अटक केलेला आसिफ सध्या दोन दिवसांच्या पोलिस कोठडीत आहे.