Goa Crime News: बामणवाडा-शिवोली येथे ट्युशनसाठी जाणाऱ्या अल्पवयीन मुलीचा पाठलाग करत बिजॉय कुमार (22) या पश्चिम बंगाल येथील तरुणाने (सध्या राहाणारा पोर्तावाडा-शिवोली) विनयभंग केल्याची तक्रार मंगळवारी हणजूण पोलिसांत दाखल करण्‍यात आली आहे.

हा प्रकार उघडकीस आल्‍यानंतर प्रत्‍यक्षदर्शी काही नागरिकांनी संशयिताला चोप देत पोलिसांच्या ताब्यात दिले. संशयित हा शिवोली थिएटर जंक्शनवरील एका नामांकित चहाफराळाच्या हॉटेलात वेटर म्‍हणून काम करत आहे.

मंगळवारी सुट्टीवर असल्याने तो बाहेर पडला होता. संशयित आरोपी बिजॉय कुमारच्‍या बचावासाठी घटनास्थळी दाखल झालेल्या संबंधित हॉटेलच्या व्यवस्थापकासही मारहाण झाल्याची माहिती समोर आली आहे.

महिलेवर लैंगिक अत्याचार, गुन्हा नोंद

बार्देशमध्ये एका 50 वर्षीय महिलेवर लैंगिक अत्याचार केल्याच्या आरोपाखाली 53 वर्षीय संशयितावर पोलिसांनी गुन्हा नोंद केला. ही घटना 12 व 14 सप्टेंबर दरम्यान घडलेली. पीडिताने 21 नोव्हेंबर रोजी पोलिसांत याविषयी तक्रार दिली.

त्यानुसार पोलिसांनी भादंसंच्या 376 कलमान्वये गुन्हा दाखल केला. या तक्रारदार 50 वर्षीय पिडित महिलेचे संशयितासोबत मैत्रीचे नाते होते. याचा फायदा घेत संशयिताने वरील दिवशी एका हॉटेलमध्ये नेऊन पिडितेवर लैंगिक अत्याचार केला. पुढील तपास म्हापसा पोलिस करीत आहेत.