म्हापसा: काही दिवसांपूर्वी गोव्यातील नास्नोळा येथून एक अत्यंत धक्कादायक आणि संतापजनक घटना समोर आली होती. बास्तोडा जंक्शन येथे सोमवारी रात्री (२ जून) एका क्षुल्लक पार्किंगच्या कारणावरून २५ जणांच्या टोळक्याने एका दाम्पत्याला बेदम मारहाण केली. या घटनेतील धक्कादायक बाब म्हणजे, मारहाण झालेल्या श्रुती शिरोडकर या गरोदर असतानाही त्यांना गंभीरपणे मारहाण करण्यात आली, ज्यामुळे परिसरात तीव्र संताप व्यक्त होत आहे.

तिघांना ५ दिवसांची पोलीस कोठडी

या प्रकरणी म्हापसा पोलीस ठाण्यात गुन्हा नोंद करण्यात आला आहे. पोलिसांनी या घटनेतील प्रमुख आरोपी असलेल्या मोईरा येथील रहिवासी रंगनाथ शेट्ये (वय ५५), विनोद शेटकर (वय ४७) आणि कौशल शेट्ये (वय ३२) या तिघांना अटक केली असून, त्यांना ५ दिवसांची पोलीस कोठडी सुनावण्यात आली आहे. म्हापसा पोलीस या प्रकरणाचा अधिक तपास करत आहेत.

नेमके काय घडले?

विवेक आणि श्रुती शिरोडकर हे दाम्पत्य शॉरमाची गाडी लावून व्यवसाय करतात. बास्तोडा जंक्शन येथे सोमवारी रात्री आठच्या सुमारास पार्किंगच्या किरकोळ कारणावरून शिरोडकर दाम्पत्य आणि काही संशयितांमध्ये वाद झाला. या वादादरम्यान संशयितांनी विवेक यांना धमकी दिली होती.

यानंतर सायंकाळी शिरोडकरांनी आपली शॉरमाची गाडी सुरू केली. त्याचवेळी, सुमारे २५ जणांचे टोळके हातात लाकडी दांडके, लोखंडी सळ्या आणि धारदार शस्त्रे घेऊन बास्तोडा जंक्शन येथे आले. या टोळक्याने व्हॅनमधून विवेक यांना खाली ओढत मारहाण करण्यास सुरुवात केली.

विवेक यांना वाचवण्यासाठी त्यांची पत्नी श्रुती धावून आल्या असता, त्यांनाही बेदम मारहाण करण्यात आली. या हल्ल्यात विवेक आणि श्रुती या दोघांनाही गंभीर दुखापत झाली आहे. त्यांना पुढील वैद्यकीय तपासणीसाठी अझिलो रुग्णालयात दाखल करण्यात आले होते.