डिचोली: भर दिवाळीच्या दिवशी बेपत्ता झालेल्या डिचोलीतील सुवर्ण दत्ता गोवेकर (वय ४५) याचा मृतदेह अखेर आज पिळगाव येथे मांडवी नदीत आढळून आला. शोध मोहीम हाती घेतल्यानंतर आज दुपारी हा मृतदेह डिचोली अग्निशमन दलाच्या जवानांच्या हाती लागला. त्याने नदीत उडी मारून आत्महत्या केली असावी असा संशय आहे. मृत सुवर्ण हा आतीलपेठ-डिचोली येथील रहिवासी होता. तो मानव संशोधन विकास महामंडळात सुरक्षा रक्षक म्हणून कामाला होता.

मृतदेह बाहेर काढल्यानंतर पोलिसांनी पंचनामा करून वैद्यकीय तपासणीसाठी तो बांबोळी येथे पाठवून दिला. अग्निशमन दलाचे लिडींग फायर फायटर महादेव गावस यांच्या नेतृत्वाखाली रामदास परब (चालक ऑपरेटर), विशांत वायंगणकर, युवराज गावकर, राकेश मातोणकर आणि रुपेश गावस यांनी शोध मोहिमेत भाग घेतला होता.

सुवर्ण हा काल (सोमवारी) दिवाळीच्या दिवशी घरातून बेपत्ता झाला होता. सायंकाळपासून त्याचे नातलग त्याचा शोध घेत होते. याप्रकरणी पोलिसात तक्रारही करण्यात आली होती. दरम्यान, सुवर्ण याच्या मोबाईलवर संपर्क केला असता, पिळगावपर्यंत लोकेशन मिळाले.

त्यानंतर पिळगाव येथे जाऊन शोध घेतला असता, पिळगाव येथील मांडवी नदीकाठी असलेल्या जेटीवर त्याचे चप्पल तसेच जवळपास स्कुटर आणि डिकीमध्ये मोबाईल आढळून आला. त्यामुळे तो नदीत बुडाला असावा अशी शक्यता वाढली होती. आज (मंगळवारी) सकाळी किनारी पोलिस दल आणि नंतर डिचोलीच्या अग्निशमन दलाच्या जवानांनी मोटार बोटीद्वारे नदीत शोध सुरू केला असता दुपारी सुवर्ण याचा मृतदेह अग्निशमन दलाच्या जवानांच्या हाती लागला.

एकोशीत महिलेचा मृतदेह

साल्वादोर-द-मुंद पंचायत क्षेत्रात एकोशी येथे नदीत तरंगणारा एका महिलेचा मृतदेह आज सापडला अग्निशमन दलाच्या जवानांनी तो बाहेर काढला. सायंकाळपर्यंत त्या मृतदेहाची ओळख पटली नव्हती.