पणजी: बसमध्ये १६ वर्षीय अल्पवयीन मुलीचा विनयभंग करून तिचा छळ करणारा डिग्सन लोबो (४९) याला येथील विशेष पोक्सो न्यायालयाने दोषी ठरवत ३ वर्षांच्या साध्या कारावासाची शिक्षा सुनावली. तसेच विविध कलमांखाली दंडही ठोठावला. दंडाची संपूर्ण रक्कम पीडितेला भरपाई म्हणून देण्याचा आदेश न्यायालयाने दिला आहे.

ही घटना १६ डिसेंबर २०२४ रोजी म्हापसा कदंब बसस्थानक परिसरात घडली होती. पीडित मुलगी शाळेतून घरी जात असताना आरोपी तिच्या शेजारी येऊन बसला. मॉडेलिंगची संधी देण्याचे आमिष दाखवत त्याने तिच्याशी संवाद साधण्याचा प्रयत्न केला. त्‍यानंतर आरोपीने तिच्यासमोर अश्लील चाळे करत तिचा विनयभंग केला. याप्रसंगी पीडित मुलीने प्रसंगावधान राखत तातडीने आपल्या भावाला फोन करून घडलेला प्रकार सांगितला. त्यानंतर ती बसमधून उतरली व आरोपीची ओळख पटवली.

पुढे पीडितेच्या भावाने आणि नातेवाईकांनी आरोपीला पकडून पोलिसांच्या स्वाधीन केले होते. विशेष न्यायालयाच्या न्यायाधीश डॉ. पूजा कवळेकर यांनी निकाल देताना नमूद केले की, सरकारी पक्षाने पीडितेचे वय तसेच घटनेतील वस्तुस्थिती यशस्वीपणे सिद्ध केली आहे. तपास प्रक्रियेत काही त्रुटी असल्या तरी त्यावरून पीडितेची विश्वासार्ह साक्ष नाकारता येणार नाही. तिने अत्यंत धैर्याने या कठीण प्रसंगाचा सामना केला आणि आरोपीला पकडून देण्यात महत्त्वाची भूमिका बजावली. अशा स्वरूपाच्या गुन्ह्यात आरोपीला केवळ नावापुरती शिक्षा देणे न्यायाच्या उद्देशाला हरताळ फासणारे ठरेल.

न्यायालयाने आरोपीला पोक्सो कायदा कलम ८ अंतर्गत ३ वर्षे कारावास आणि २० हजार रुपये दंड ठोठावला. शिवाय भारतीय न्याय संहिता कलम ७५ अंतर्गत २ वर्षे कारावास व १० हजार रुपये दंड, बीएनएस कलम ७८ अंतर्गत २ वर्षे कारावास व १० हजार रुपये दंड, बीएनएस कलम ७९ अंतर्गत २ वर्षे कारावास व १० हजार रुपये दंड आणि पोक्सो कायदा कलम १२ अंतर्गत २ वर्षे कारावास व १० हजार रुपये दंड अशी शिक्षा सुनावली आली