म्हापसा: सध्या गोव्यात चोरीच्या प्रकरणांना बराच ऊत आला आहे. हणजूण येथील घर फोडून सुवर्णालंकार जप्त करणाऱ्या एकूण पाच महिलांना गोवा पोलिसांनी अटक केली आहे. फिर्यादी डॉ. फेन्टन डिसोझा यांनी नोंदवलेल्या तक्रारीनुसार १९ ते २३ डिसेंबरच्या काळात हे चोरीचे प्रकरण घडले असून पाच संशयित आरोपींना पोलिसांनी त्वरित ताब्यात घेतले आहे.

फिर्यादी डॉ. फेन्टन डिसोझा यांनी पोलिसांना दिलेल्या माहितीनुसार घर बंद असताना आरोपींनी खिडक्यांच्या ग्रिल्स तोडल्या आणि घरात प्रवेश केला. चोरांनी यावेळी अनेक सोन्याचे तसेच रत्नजडित ऐवज आणि काही इतर वस्तू मिळून लाखो रुपयांचा गंडा घातला.

घरात चोरी झाली असल्याचे २३ डिसेंबर रोजी फिर्यादीच्या लक्षात येताच त्यांनी पोलिसांकडे तक्रार नोंदवली आणि पोलिसांनी २९ डिसेंबर रोजी पाच आरोपींना ताब्यात घेतलं. सध्या पोलिसांनी काही ऐवज हस्तगत केले असून पुढील तपास सुरु आहे.

आरोप केलेल्या संशयीतांमध्ये ललिता लमाणी, लक्ष्मी लमाणी, रेणूका पवार, पारू पुजारी व निलवा लमाणी यांचा समावेश आहे. या पाचही महिला गोव्याच्या नसून कर्नाटकच्या आहेत. त्या गोव्यात भंगार गोळा करण्याचं काम करतात आणि कुचेली करासवाडा येथे राहायला असल्याची माहिती पोलिसांना मिळाली आहे.