Goa Crime: दक्षिण गोव्यातील नामांकित अभियांत्रिकी महाविद्यालयातील एका विद्यार्थिनीवर ज्या वाहनात बलात्कार झाला, ते चारचाकी वाहन पोलिसांनी जप्त केले आहे. हे वाहन परत करावे,यासाठी अटकेत असलेल्या वाहनाचा मालक संशयित चंद्रशेखर लमाणी याने केलेला अर्ज प्रथमश्रेणी न्यायालयाने फेटाळला.

या वाहनात बलात्कार झाल्याने ते या प्रकरणातील महत्वाचा पुरावा आहे, व तपासकाम प्राथमिक टप्प्यात असल्याचे निरीक्षण न्यायलयाने नोंदवले.

या बलात्काराच्या घटनेला 15 दिवसच उलटून गेले आहेत. ही घटना वाहनात झाल्याने ते जप्त करण्यात आले आहे.

काही पुरावे या वाहनातून जमा करण्यात आले आहेत. अजून फॉरेन्सिक लेबोरेटरीचा (एफएसएल) अहवाल आलेला नाही. जर या वाहनातून अधिक पुरावा शोधायचा असल्यास ते वाहन दिल्यावर तो नष्ट होईल. त्यामुळे हे वाहन तपासकामाचा भाग आहे.

त्यामुळे ते दिले जाऊ नये, अशी बाजू सरकारी वकील जे. रॉड्रिग्ज यांनी मांडली. बलात्कार प्रकरणी पोलिसांनी जप्त केलेले वाहन हे संशयिताचे एकमेव उदारनिर्वाहाचे साधन आहे. या वाहनाच्या धंद्यावरच त्याचे कुटुंब अवलंबून आहे.

पोलिसांनी घटनास्थळी पुरावे जमा केले आहेत त्यामुळे या वाहनाची पोलिसांना आवश्‍यकता नसावी. त्यामुळे हे वाहन संशयिताला परत करावे, असा युक्तिवाद धुमस्कर यांनी केला.