पर्रा: मंगळवारी (दि.७) रात्री उशिरा पर्रा येथील एका बांधकाम साईटवर मजुराची निर्घृण हत्या झाल्याची धक्कादायक घटना उघडकीस आली आहे. ही घटना रात्री १० ते ११ च्या सुमारास घडली असून, आरोपींनी क्रूरतेची परिसीमा गाठल्याचे दिसून येते.

नेमकी काय घडली घटना?

मिळालेल्या माहितीनुसार, बांधकाम साईटशेजारील एका लहान खोलीत तीन मजूर एकत्र राहत होते. मंगळवारी रात्री याच खोलीत दोघांनी तिसऱ्या मजुरावर तीक्ष्ण हत्याराने हल्ला केला. या हल्ल्यात मृत मजुराच्या डोक्यावर, मानेवर आणि पोटावर गंभीर वार करण्यात आले. एवढेच नाही, तर आरोपींनी त्याच्या गुप्तांगाचीही विटंबना केली असल्याचे समोर आले आहे. या भीषण घटनेनंतर दोन्ही आरोपी घटनास्थळावरून फरार झालेत आणि पोलीस तपास सुरु झाला आहे.

पोलिसांकडून खुनाच्या गुन्ह्याचा तपास सुरू

या घटनेची माहिती मिळताच, म्हापसा पोलीस तातडीने घटनास्थळी दाखल झाले. पोलीस निरीक्षक निखिल पालेकर, पोलिस उपअधीक्षक विल्सन डिसोझा आणि उत्तर गोव्याचे पोलीस अधीक्षक राहुल गुप्ता यांनी स्वतः घटनास्थळाला भेट देऊन परिस्थितीची पाहणी केली. पोलिसांनी खुनाचा गुन्हा दाखल केला असून, फरार आरोपींचा शोध घेण्यासाठी तपास सुरू केला आहे.

या घटनेमुळे परिसरात भीतीचे वातावरण निर्माण झाले आहे. पोलिसांनी या प्रकरणाचा गांभीर्याने तपास सुरू केला असून या हत्येमागील नेमके कारण काय होते, याचा पोलीस शोध घेत आहेत.