पणजी: दोना पावला आणि म्हापसा येथे झालेल्या धाडसी दरोड्यांनी राज्य हादरवून सोडणाऱ्या बांगलादेशी टोळीच्या पाच संशयितांना गोवा गुन्हे शाखेने अखेर दिल्लीहून गोव्यात आणले आहे. दिल्ली पोलिसांच्या गुन्हे शाखेने अटक केलेल्या या दरोडेखोरांचा ताबा घेण्यासाठी गेलेले गोवा पोलिसांचे पथक त्यांना घेऊन राज्यात दाखल झाले असून, सध्या न्यायदंडाधिकाऱ्यांनी सर्वांना ११ दिवसांची पोलिस कोठडी सुनावली आहे.

२०२५ मध्ये या टोळीने गोव्यात दोन मोठे दरोडे टाकले होते. २० एप्रिल २०२५ रोजी याच दरोडेखोरांनी दोना पावला येथील बंगल्यात वृद्धांना कोंडून १ किलो सोने आणि ३ लाखांची रोकड लंपास केली होती. तसेच ७ ऑक्टोबर २०२५ रोजी म्हापसा येथील गणेशपुरी हाउसिंग बोर्ड परिसरात एका कुटुंबाला मारहाण करून ३५ लाखांचा ऐवज लुटला होता.

या गुन्ह्यांच्या तपासासाठी जानेवारी २०२६ मध्ये हे प्रकरण गुन्हे शाखेकडे सोपवण्यात आले होते. १४ एप्रिल २०२६ रोजी दिल्लीतील सराई काळे खान परिसरात झालेल्या चकमकीनंतर दिल्ली पोलिसांनी या टोळीला बेड्या ठोकल्या होत्या. पोलिस अधीक्षक राहुल गुप्ता यांच्या मार्गदर्शनाखाली तीन पोलिस निरीक्षक आणि २० हवालदारांचे विशेष पथक गेल्या आठवड्यात दिल्लीला रवाना झाले होते. कायदेशीर प्रक्रिया आणि ट्रान्झिट वॉरंट पूर्ण केल्यानंतर, या टोळीतील पाच प्रमुख आरोपींना गोव्यात आणण्यात आले आहे.

या टोळीने केवळ गोव्यातच (Goa) नव्हे, तर कर्नाटक, ओडिशा आणि उत्तर प्रदेश या राज्यांतही गुन्हे केल्याचे तपासात निष्पन्न झाले आहे. आता पोलिस कोठडीत असलेल्या या संशयितांकडून म्हापसा आणि दोना पावला लुटीतील मुद्देमाल हस्तगत करणे व फरार असलेले शाकायत व इलियास यांना शोधण्याचे पोलिसांपुढे मोठे आव्हान असणार आहे.