मडगाव: अनैतिक संबंधातून प्रियकराच्या सहाय्याने आपला पती संगनगौडा अरहुंशी याचा खून करून त्याचा मृतदेह अनमोड येथील जंगलात फेकल्याच्या आरोपाखाली अटक करण्यात आलेली गदग (कर्नाटक) येथील मयताची पत्नी लक्ष्मी अरहुंशी हिच्यासह सुरेश पुजार, जगदीश दोडामणी व मुतण्णा अनवलाड या चार जणांवरील खुनाचा गुन्हा सिद्ध न झाल्याने दक्षिण गोव्याचे अतिरिक्त सत्र न्यायाधीश राम प्रभूदेसाई यांनी सर्वांची निर्दोष मुक्तता केली.

या प्रकरणात लक्ष्मी आणि सुरेश पुजार यांच्यावतीने ॲड. रोहन देसाई, जगदीश दोडामणी यांच्यावतीने ॲड. अमरनाथ देसाई, तर मुतण्णा अनवलाड यांच्यावतीने ॲड. स्पेन्सर व्हिएगस यांनी बाजू मांडली. राज्याच्यावतीने सरकारी वकील ज्योतीन ठक्कर यांनी बाजू मांडली.

या प्रकरणाची पार्श्वभूमी अशी की, १७ जानेवारी २०१९ रोजी अनमोड घाटावर पिकनिकसाठी आलेल्या काही युवकांना खाली खाडीत एक मृतदेह आढळून आला होता. याप्रकरणी कुळे पोलिसांना पाचारण केल्यानंतर कुणीतरी या इसमाचा दोरीने गळा आवळून खून करून त्याचा मृतदेह खाडीत टाकल्याचे आढळून आले होते.

संशयाचा फायदा

या प्रकरणी पोलिसांना मयताचा गळा आवळून खून केल्याचा दावा न्यायालयात सिद्ध करता आला नाही. तसेच ॲसिडचा वापर केला गेल्याचेही सिद्ध झाले नाही. त्यामुळे संशयाचा फायदा देत न्या. प्रभूदेसाई यांनी सर्वांची निर्दोष मुक्तता केली.