पणजी: राजधानीत अजूनही व्यावसायिक सिलिंडरचा पुरवठा सुरळीत झालेला नाही. अनेक हॉटेल, रेस्टॉरंटधारकांना सिलिंडर मिळवण्यासाठी धावाधाव करावी लागत आहे, तर मेनू कार्डवरील काही पदार्थांवर लागलेली कात्री कायम ठेवावी लागली आहे.

घरगुती स्वयंपाकाचा सिलिंडर मिळवण्यासाठी शहरातील वितरकांच्या कार्यालयाबाहेर ज्या रांगा लागत होत्या, त्या आता कमी झाल्या आहेत.

अत्यावश्यक सेवांसाठी सिलिंडर प्रथम द्या, त्यानंतर हॉटेल व रेस्टॉरंटसाठी सिलिंडर द्यावेत, असे केंद्र सरकारने स्पष्ट सूचित केले आहे. त्यामुळे व्यवसायिक सिलिंडर मिळवणे हॉटेल व रेस्टॉरंट मालकांसमोर आव्हान ठरत आहे.

काही लहान हॉटेलधारकांनी आपला व्यवसाय बंद केला आहे. तर मोठ्या हॉटेलधारकांकडे मेनू कार्डवरील पदार्थांची कपात कायम ठेवली आहे.

गॅस सिलिंडरची कमतरता नाही : कामत

राज्यात घरगुती गॅस सिलिंडरची मुळीच कमतरता नाही; मात्र काही लोक बुकिंग न करता गॅस सिलिंडर विक्रेत्यांच्या दुकानावर जाऊन मागणी करतात. काहीजण रस्त्यावर गॅस सिलिंडरची वाहने अडवतात. हा बेशिस्तपणा असून असे प्रकार खपवून घेतले जाणार नाहीत, असे सार्वजनिक बांधकाम मंत्री दिगंबर कामत यांनी मडगावात स्पष्ट केले.

सरकारने आता व्यावसायिक गॅस सिलिंडरवर काही प्रमाणात निर्बंध घातले आहेत; मात्र त्याचा राज्यात किंवा राज्यातील पर्यटनावर मोठा परिणाम झालेला नाही. पुढील दोन दिवसांत व्यावसायिक गॅस सिलिंडरचे वितरण सुरळीत होईल, असे मंत्री कामत यांनी सांगितले. नागरिकांनी गॅस सिलिंडरच्या पुरवठ्यासंदर्भात निश्चिंत राहावे; घाबरू नये, असे आवाहन त्यांनी केले आहे.

हॉटेल व रेस्टॉरंटधारकांकडून होणाऱ्या मागणीइतका पुरवठा होत नाही. अनेकांकडून दररोज सिलिंडरची मागणी होते, परंतु सरकारने घालून दिलेल्या नियमांनुसार पुरवठा केला जातो. व्यावसायिक सिलिंडर जेवढे मिळतात, तेवढे मागणी झालेल्यांना पुरवले जातात. येत्या काही दिवसांत पुरवठा सुरळीत होईल, अशी अपेक्षा आहे.

- चिराग परमार, भारत गॅसचे वितरण प्रमुख.