मडगाव: लिफ्ट खाली येण्यापूर्वीच गेट उघडून आत शिरल्याने ७० वर्षीय ज्येष्ठ महिलेचा मृत्यू झाल्याची दुर्दैवी घटना कोलवा येथे घडली. मार्सिया रोसा पाशेको असे मृत महिलेचे नाव असून, त्या सेवानिवृत्त डॉक्टर असल्याची माहिती कोलवा पोलिसांनी दिली.पोलिसांनी दिलेल्या माहितीनुसार, गुरुवारी कोलवा येथील ‘रिलायन्स पार्क’ या इमारतीत ही दुर्घटना घडली. मार्सिया या फातोर्डा येथील चंद्रवाडा येथील असून,त्या मित्राला भेटण्यासाठी कोलवा येथे गेल्या होत्या.

पहिल्या मजल्यावर तो मित्र राहात असल्याने वर जाण्यासाठी त्यांनी लिफ्टचे बटन दाबले, दार उघडले आणि आत पाऊल टाकले. मात्र, त्यावेळी लिफ्ट वरच्या मजल्यावर होती. मार्सिया काही कळण्याच्या अगोदरच खाली पडल्या. त्याचवेळी लिफ्ट खाली येत होती. ते पाहून त्यांनी मदतीसाठी आरडाओरडा केल्यानंतर इमारतीत राहणारे धावून आले आणि त्यांनी लिफ्ट बंद केली.

नंतर अग्निशमन दलाच्या जवानांना पाचारण करून त्यांना बाहेर काढण्यात आले. लिफ्टची धडक बसल्याने त्या गंभीर जखमी झाल्या. जिल्हा रुग्णालयात उपचारासाठी दाखल केले असता, त्यांचा मृत्यू झाला. शवचिकित्सेनंतर मृतदेह कुटुंबीयांच्या स्वाधीन केल्याची माहिती पोलिसांनी दिली. अनैसर्गिक मृत्यू म्हणून कोलवा पोलिसांनी ही घटना नोंदविली आहे. पोलिस निरीक्षक विक्रम नाईक यांच्या मार्गदर्शनाखाली उपनिरीक्षक अनिल कृष्णा पुढील तपास करीत आहेत.

स्वत:च्या इमारतीतच अंत

कोलवा येथे ज्या इमारतीमध्ये ही दुर्घटना घडली, ती एकमजली आहे. पोलिसांनी दिलेल्या माहितीनुसार, ही इमारत मृत महिला मार्सिया यांच्याच मालकीची आहे. लिफ्टही जुनी असून, तिची देखभाल-दुरुस्ती केली जात नव्हती. त्यामुळेच ही दुर्दैवी घटना घडली. यात कुठलाही घातपात नसल्याचे पोलिसांनी सांगितले.