हणजूण येथील वादग्रस्‍त ‘कर्लिस’ बार ॲण्‍ड रेस्टॉरंटवर हातोडा फिरविल्यानंतर गोवा किनारी व्‍यवस्‍थापन प्राधिकरण जीसीझेडएमए (Goa Coastal Zone Management Authority) विभागाच्या पथकाने काल मंगळवारी सकाळीच कळंगुट समुद्रकिनाऱ्यावरील प्रसिद्ध ‘सौझा लोबो’ Souza Lobo रेस्टॉरंटकडे आपला मोर्चा वळविला. परंतु हे बांधकाम पाडण्‍यासाठी आवश्यक कागदपत्रे नसल्याने या पथकाला हात हलवत माघारी फिरावे लागले. त्‍यामुळे या पथकाची नाचक्की झाली.

कळंगुट येथील ‘सौझा लोबो’ या रेस्‍टॉरंटवर कारवाई करण्‍याच्‍या उद्देशाने जीसीझेडएमएचे पथक गेले असता मालक ज्युड लोबो यांनी आपल्याकडील कागदपत्रे त्यांना सादर करून आपली बाजू समर्थपणे मांडली. परिणामी पूर्ण तयारी आणि आवश्‍‍यक कागदपत्रे न घेताच गेलेल्‍या या पथकावर हात हलवत माघारी परतण्‍याची नामुष्‍की ओढवली.

सरकारकडून स्‍थानिकांवर अन्‍याय: गोवा मुक्तीच्या आधीपासून कळंगुट येथे कार्यरत असलेल्या ‘सौझा लोबो’ या रेस्टॉरंटवर कारवाई करण्यासाठी सरकारने जी चपळाई दाखविली, तीच चपळाई शेजारच्या अरोरा नामक परप्रांतीय व्यावसायिकाने केलेले अनधिकृत बांधकाम पाडण्‍यासाठी दाखवावी.

ज्युड लोबो, ‘सौझा लोबो’चे मालक-

या बांधकामाविरोधात आपण केलेली तक्रार कचरापेटीत टाकण्‍यात आली. उलट अरोरा याने आपल्‍याविरोधात केलेल्या तक्रारीची तात्काळ दखल घेण्‍यात आली. यावरून सरकार पैशासाठी स्थानिकांवर अन्याय करीत असल्‍याचे स्‍पष्‍ट होते.